«Նոր Սահմանադրության նախագիծն առաջին տպավորությամբ լավն է՝ բացի նախագահի մասով: Ինձ բնավ դուր չի գալիս, որ նախագահին պետք է ընտրեն ինչ-որ ընտրիչ-մնտրիչներ, ինչ-որ թվեր, թվաբանություններ են մեջտեղ բերել: Ինձ դուր չի գալիս անկախությունից ու ժողովրդի ընտրությունից զրկված նախագահ ունենալը: Ես դա ճիշտ չեմ համարում»,- «Առաջին լրատվական»-ի հետ զրույցում ասաց նախկին դատավոր, ՀՀԿ-ական Պարգև Օհանյանը:
Վերջինիս խոսքով՝ անկախ նրանից, թե նախագահը փոփոխություններից հետո ինչ լիազորություններ կունենա՝ անկախ կլինի, թե ոչ, մեր տիպի երկրների համար շատ կարևոր է, որ ունենանք նախագահ, որը ընտրվում է ժողովրդի կողմից:
«Մենք այն ժողովուրդներից ենք, որ նախագահ ենք ուզում կամ, եթե կուզեք՝ թագավոր: Մեր ժողովուրդը թագավոր է սիրում: Սիրում է, որ գնա ընտրության ու թագավոր ընտրի, որքան ուզում է՝ համամասնական լինի, կուսակցությունենր լինեն»,- ասաց նա:
Ինչ վերաբերում է Սահմանադրությամբ պատգամավորների թիվը չամրագրելուն և միայն նվազագույն շեմ սահմանելուն, Օհանյանն ասաց, որ ինքը դա չի կարևորում: Հայաստանը միշտ էլ թաղված է եղել կոռուպցիայի մեջ, որի դրսևորումները տարեցտարի ավելի են կատարելագործվում: Այնպես որ՝ կարծել, թե ով փող տա, պատգամավոր կդառնա, զարմանալի չէ: «Էհ, թող լինի 500 պատգամավոր կամ 50: Դրանից բան չի փոխվում: Թող բոլորն էլ դառնան պատգամավոր ու ուրախանան այդ փաստից»,- հավելեց նախկին դատավորը:
Օհանյանը վտանգ չի տեսնում նրանում, որ սահմանադրական բարեփոխումները քաղաքական մենաշնորհ են ապահովում, և հսկայական լիազորությունները կենտրոնացված են լինելու ամենաշատ ձայներ հավաքած քաղաքական ուժի ղեկավարի ձեռքում: «Թող այդպես էլ լինի, ես վտանգ չեմ տեսնում: Ես դեմ եմ ժողովրդավարությանը: Ինչքան շատ կուսակցություն, այնքան թույլ պետություն: Դեռ Նժդեհն է ասել, որ մեր պես փոքր պետության ու մեր հարևանների պայմաններում մենք իրավունք չունենք բազմաթիվ կուսակցություններ ունենալու: Ավելի լավ է ձևական բազմակուսակցություն լինի, բայց դե ֆակտո մեկ կուսակցություն ուժեղ լինի ու իշխի: Որ սովետի ժամանակ մեկ կուսակցություն էր, սովետը դրանից չտուժեց՝ կարգին հզոր պետություն էր, իսկ կենդանի վկան հիմա Չինաստանն է:
Այնպես որ՝ ժողովրդավարությունը այնքան էլ լավ բան չէ, դա վատ բան է՝ հատկապես, երբ այն ընտանիք է մտնում»,- եզրափակեց ժողովրդավարություն քարոզող իշխող Հանրապետական կուսակցության ներկայացուցիչը:
