Deutsche Welle-ի փոխանցմամբ` «Թուրքական հոսք» գազատարը զգալի դժվարություններ է կրում և ըստ ամենայնի` բավական հետ կընկնի իր գրաֆիկից: Այդ մասին են վկայում վերջին օրերի հաղորդագրությունները:
Հուլիսի 8-ին «Գազպրոմը» անսպասելիորեն խզել է իտալական Saipem ընկերության հետ պայմանագիրը, որն առնչվում էր Սև ծովի հատակով «Թուրքական հոսք» գազատարի առաջին ճյուղի կառուցմանը:
Ամենազարմանալին այն է, որ դա տեղի ունեցավ անմիջապես այն բանից հետո, երբ այդ ընկերությանը պատկանող Castoro Sei նավը, որը մասնագիտացած է խողովակաշարեր անցկացնելու ոլորտում, խարիսխ գցեց ռուսական Անապա նավահանգստում:
Փորձագետների հաշվարկով` «Գազպրոմը» պետք է դրա համար Saipem-ին վճարեր մոտ 300 միլիոն դոլար: Ուշադրության արժանի է այն, որ հուլիսի 8-ին Աշգաբադը հայտարարեց, որ «Գազպրոմը» 2015 թվականից չի վճարել «Թուրքմենգազ» պետական ընկերությանն ունեցած իր պարտքերը` մատակարարված թուրքմենական գազի ծավալի համար:
«Գազպրոմը» պատրաստվում է «Հյուսիսային հոսք 2» գազատարի նախագծին: Խոսքն այդ գազատարի 3-րդ և 4-րդ ճյուղերի կառուցման մասին է, որոնք Ռուսաստանից պետք է Բալթիկ ծովի հատակով ձգվեն դեպի Գերմանիա:
«Գազպրոմի» ղեկավար Ալեքսեյ Միլերը հունիսի 26-ին Մոսկվայում «Գազպրոմի» բաժնետերերի տարեկան հանդիպման ժամանակ հայտարարել է, որ «Հյուսիսային հոսք 2» գազատարի երկու ճյուղերը պետք է շահագործման հանձնվեն մինչև 2019 թվականի ավարտը:
Հենց այդ ժամանակ էլ սկզբնական շրջանում պլանավորվել էր շահագործման հանձնել «Թուրքական հոսքի» չորրորդ ճյուղը, որպեսզի ամբողջովին դադարեցվի Ուկրաինայի տարածքով գազի մատակարարումը: Սակայն հուլիսի 7-8-ին պարզվեց, որ դա հաստատապես չի ստացվելու: Դրա համար էլ զարմանալի չէր, որ չնայած բոլոր հավաստիացումներին` Մոսկվան հանկարծ սկսեց խոսել Ուկրաինայի տարածքով գազի տարանցումը 2019 թվականից հետո էլ շարունակելու մասին:
