Երեկ մի շարք իրավապաշտպան կազմակերպություններ Լեյլա Յունուսի դստեր՝ Դինարա Յունուսի հետ պիկետ են անցկացրել Եվրախորհրդարանի շենքի դիմաց: Երկու տասնյակ մարդկանց հիմնական պահանջը եղել է Ադրբեջանում քաղբանտարկյալների ազատ արձակումը: Այս մասին հայտնում է haqqin.az-ը:
Պիկետը կազմակերպել են Sports for rights campaign, The international Partnership for Human Rights, The İnternational Federation for Human Rights, The Human Rights House Foundation, The World Organisation Against Torture, ILGA-Europe և Front Line Defenders իրավապաշտպան կազմակերպությունները: Սակայն բացի հայտնի իրավապաշտպան կազմակերպություններից՝ ակցիային մասնակցել են նաև սեռական փոքրամասնությունների ներկայացուցիչներ:
Ակտիվիստների ձեռքին եղել են ԼԳԲՏ-շարժման դրոշներ և Էմին Հուսեյնովի, Ռասուլ Ջաֆարովի և Խադիջա Իսմաիլովայի դիմանկարները:
Պիկետից անմիջապես հետո Եվրոպայում սեռական փոքրամասնությունների իրավունքների հայտնի պաշտպան, Եվրախորհրդարանի փոխնախագահ Ուլրիկե Լունաչեկն անցկացրել է Baku Games: Run for human rights միջոցառումը, որտեղ ևս պահանջել է քաղբանտարկյալների ազատ արձակում:
Սեռական փոքրամասնությունների ներկայացուցիչները հայտարարել են Բաքվում Եվրոպական խաղերի մեկնարկի օրն ի պաշտպանություն Ադրբեջանում ժողովրդավարության հանրահավաքներ անցկացնելու իրենց վճռականության մասին: Sports for Human Rights ընկերության ներկայացուցիչն արդեն սոցցանցերում հայտարարել է հունիսի 12-ին մի շարք եվրոպական մայրաքաղաքներում բողոքի ակցիաների անցկացման մասին:
