Պոլսո հայոց պատրիարքարանը կոչ է անում ապրիլի 24-ին մասնակցել Հայոց ցեղասպանության 100-րդ տարելիցին նվիրված ծիսական արարողությանը։ Այս մասին գրում է Թուրքիայում լույս տեսնող հայկական «Ակօս» շաբաթաթերթը։
Սույն հայտարարությունը պատրիարքարանը տարածել է ֆեյսբուքյան էջի միջոցով։ Պատրիարքարանին կից Սուրբ Աստվածածին եկեղեցում ապրիլի 24-ի առավոտյան պատարագ է մատուցվելու, որի ժամանակ հիշելու են «1915 թվականին կյանքից հեռացածներին»։ Պատարագը մատուցելու է Պոլսո հայոց պատրիարքի ընդհանուր փոխանորդ Արամ արքեպիսկոպոս Աթեշյանը։
Ավելի վաղ թուրքական աղբյուրները նշում էին, որ Աթեշյանը Հայոց ցեղասպանություն արտահայտության փոխարեն կիրառելու է «ընդհանուր ցավ» բառակապակցությունը։
Թուրքիայի վարչապետ Ահմեթ Դավութօղլուն ապրիլի 24-ին ընդառաջ հայերին ուղղված ուղերձում անդրադարձել է սույն միջոցառմանը. « Օսմանյան կայսրության հայերի հիշատակին և հայկական մշակութային ժառանգությանը տեր կանգնելը Թուրքիայի համար պատմական և մարդկային պարտականություն է: Այս իմաստով էլ այս տարի ապրիլի 24-ին Պոլսո հայոց պատրիարքարանի կողմից մատուցվելիք ծիսական արարողությամբ Օսմանյան կայսրության հայերի հիշատակը հարգվելու է նաև Թուրքիայում, ինչպես և անելու են ողջ աշխարհում»։
Նշենք, որ Թուրքիայի հայկական եկեղեցիները չեն միանալու հայկական և քրիստոնյա մի շարք այլ եկեղեցիներում ապրիլի 23-ին զանգեր հնչեցնելու նախաձեռնությանը։
Ապրիլի 23-ին՝ Հայաստանի ժամանակով ժամը 19։15-ին, բոլոր հայկական և քրիստոնյա մի շարք այլ եկեղեցիներում կհնչի զանգերի ղողանջ և գուժկանի 100 հարված, դրանից անմիջապես հետո կհայտարարվի լռության րոպե:
