ՀՀ տրանսպորտի և կապի նախարար Գագիկ Բեգլարյանը ապրիլի 15-ին հանդիպել է Հայաստանի Հանրապետությունում Չինաստանի Ժողովրդական Հանրապետության արտակարգ և լիազոր դեսպան Տյան Էրլունի հետ։ Այս մասին հայտնում են ՀՀ տրանսպորտի և կապի նախարարության լրատվական ծառայությունից։
Հանդիպմանը անդրադարձ է եղել մարտի 24-ին ՀՀ Նախագահ Սերժ Սարգսյանի այցին Չինաստան, որտեղ քննարկված մի շարք հարցերի թվում էին նաև հայ-չինական հնարավոր համագործակցությունը Հայաստանում իրականացվող ճանապարհաշինարարական ծրագրերում։
Նախարար Գագիկ Բեգլարյանը նշել է, որ չինական ընկերությունները շահագրգռված են Հայաստանում ենթակառուցվածքների զարգացման ծրագրերում ընդգրկվելու համար։ Հայկական կողմն ակտիվ աշխատում է չինական ընկերությունների հետ՝ երկաթուղային, ավտոմոբիլային և այլ ոլորտներում ծրագրեր իրականացնելու ուղղությամբ, ինչը Չինաստանի համար կարևոր նշանակություն ունի Մետաքսի ճանապարհի վերականգնման գործում։
Դեսպանի խոսքերով՝ վերջին շրջանում չինացի գործարարների հետաքրքրությունը աճել է Հայաստանում ներդրումներ կատարելու և տեղական ծրագրերին մասնակցելու առումով։
Նա նաև նշել է, որ Հայաստանի և Չինաստանի նախագահների կողմից տրված հանձնարարությամբ՝ առաջիկայում պետք է կայանա հայ-չինական միջկառավարական հանձնաժողովի նիստ, որտեղ կհստակեցվեն այն ոլորտները, որոնցում հայկական կողմը ցանկանում է համագործակցել Չինաստանի հետ։
Քննարկվող հարցերի թվում կլինեն նաև «Հյուսիս-հարավ ճանապարհային միջանցք ներդրումային ծրագիրը», ինչպես նաև երկաթուղային տրանսպորտի ոլորտը։
Դեսպանն իր պատրաստակամությունն է հայտնել՝ աջակցելու երկու երկրների միջև հնարավոր ծրագրերի իրականացման գործընթացներին:
