Նախագահի թեկնածու, արդեն 20 օրից ավելի հացադուլ հայտարարած Անդրիաս Ղուկասյանի նախընտրական պաստառները կարելի է տեսնել Հայաստանի տարբեր մարզերում: Ինչպես բազմիցս արդեն տեղեկացրել ենք՝ թեկնածուն չի ճանաչում Հայաստանում անցկացվելիք նախագահական ընտրությունների օրինականությունը՝ պահանջելով անվավեր ճանաչել գործող նախագահ Սերժ Սարգսյանի թեկնածությունը և ԵԱՀԿ/ԺՀՄԻԳ դիտորդներին դուրս հրավիրել Հայաստանից:
Արդյոք նախընտրական պաստառներ ունենալն արդեն իսկ չի՞ նշանակում մասնակցություն քարոզարշավին և փաստացի իր իսկ ասած՝ «կեղծ և շինծու ընտրությունների» օրինականացում՝ հարցին Ա. Ղուկասյանի նախընտրական շտաբի համակարգող Արմեն Գրիգորյանը պատասխանեց՝ ոչ. «Ընդամենը պաստառ է, ու մենք դա քարոզարշավի ձև չենք համարում, ուղղակի տեղեկացնում ենք, որ մարդիկ մեր գործողություններին տեղյակ լինեն: Քարոզարշավ կլիներ, եթե մարդկանց բուկլետներ բաժանեինք կամ փորձեինք համոզել ընտրել Անդրիաս Ղուկասյանին»:
Ա. Գրիգորյանը նշեց, որ Երևանում Ա. Ղուկասյանի հացադուլի մասին գրեթե բոլորը գիտեն, և նրանց խնդիրն է այդ մասին տեղեկացնել նաև մարզերում. «Մարզերում հնարավոր չէ՝ այնտեղ մեդիա սահմանափակում կա, հետևաբար քիչ մարդիկ գիտեն նրա հացադուլի մասին: Մենք փորձել ենք հանրությանը ինչ-որ ձևով տեղյակ պահել, որ կա այսպիսի նախագահի թեկնածու, ով այսինչ պատճառներով հացադուլ է անում: Նկարն էլ հենց «կուրտկայով» նկարն է, որն ասոցացվում է հացադուլի հետ: Մենք դա քարոզչություն չենք համարում՝ ուղղակի տեղեկացնում ենք»:
