««Հնարավոր է» նշանաբանը գոռոզ չէ, ճոխ չէ: Հնարավոր է ունենալ լավ Հայաստան, բարձր կենսաթոշակներ, հարուստ գյուղ, նոր զինատեսակներ, աշխատատեղեր, մաքուր բնություն, որտեղ հայ մարդը զգում է իրեն թագավոր, որ ինքն է թագավորը, ոչ թե նախագահը կամ օլիգարխը: Պետք է դուրս գանք կանխորոշվածության զգացումից: Պետք է մարդը դուրս գա խավարապետությունից»,- «Հ2» հեռուստաընկերության «Խոսքի իրավունք» հաղորդման եթերում ասել է նախագահի թեկնածու, «Ժառանգություն» կուսակցության նախագահ Րաֆֆի Հովհաննիսյանը:
«Իմ գործող մրցակից Սերժ Սարգսյանը բավականին գեղեցիկ բաներ է խոստացել՝ թե՛ Հայաստանում, թե՛ դրսում, և ինքը պետք է երեք շաբաթում որոշի՝ եթե ինքն ուզում է իր խոստացածը իրականություն դառնա, ուրեմն պետք է իր քաղաքապետերին, գյուղապետերին, մարզպետներին, ոստիկանությանը, որ խախտում են օրենքը, ուղղորդում զինվորներին, դպրոցներում, բանակում շարֆեր բաժանում այդ վայրերում, նրանց հորդորի հետ կանգնել այս ամենից: Կա՛մ պետք է այս ամենը թողնել, կա՛մ ընտրությունները կգնան կեղծիքի, ստի ճանապարհով: Կա անհավասարություն, ուսուցիչներին են ցուցակագրում, զինվորներին ուղղություն տալիս, խախտում են Ընտրական օրենսգիրքը, նախագահի նկարը կա պետական սեփականություն հանդիսացող շենքերի վրա, սննդի օբյեկտների վրա»,- ասել է Րաֆֆի Հովհաննիսյանը և հավելել. «Չեմ ուզում, որ մտնենք հետընտրական փլուզումների դաշտ, ես չեմ ուզում Չարենց մեջբերել և գնալ դեպի արյուն, հեղափոխության կողմնակից չեմ, միաժամանակ կուլ չեմ տալու որևէ խախտում, որևէ կեղծիք»:
Անդրադառնալով իր, Պարույր Հայրիկյանի և Հրանտ Բագրատյանի ստորագրած համատեղ փաստաթղթին և դրա վերաբերյալ նախագահի թեկնածու Արման Մելիքյանի դժգոհությանը՝ Րաֆֆի Հովհաննիսյանը նախ նշել է, որ առաջատարը հենց այդ երեք թեկնածուներն են, ապա, ներողություն խնդրելով Արման Մելիքյանից՝ նրան մտքից հանելու համար, խնդրել է նրան ևս միանալ իրենց ստորագրած փաստաթղթին, էպոսագետ թեկնածու Վարդան Սեդրակյանին՝ ևս:
