ՀԱԿ անդամ Սոս Գիմիշյանն իրեն մեղավոր էր զգում ՀԱԿ-ում այսօր ստեղծված իրավիճակի համար, նրա համար, որ չի պնդել իր կարծիքը՝ ԲՀԿ-ի հետ համագործակցելու հետ կապված: Երեկ Aгavot.am-ը ՀԱԿ և ՍԴՀԿ անդամ Գուրգեն Եղիազարյանից հետաքրքրվեց, թե նա իրեն մեղավոր չի՞ համարում: Գուրգեն Եղիազարյանը պատասխանեց՝ «իհարկե»:
Թերթի դիտարկմանը, որ ճիշտ է՝ ասուլիսում Դուք պսսշտպանեցիք ԲՀԿ-ին, բայց այն ժամանակ այնպես չէ, որ գրկաբաց ընդունում էիք ՀԱԿ-ի՝ ԲՀԿ-ի հետ տարվող քաղաքական գիծը, Գուրգեն Եղիազարյանը անկեղծ խոստովանություն արեց. «Դա այնքան պարզ է: Պարզից էլ պարզ է: Ես ուղղակի չեմ կարող ողջ ճշմարտությունն ասել, բնական է: Որովհետև իմ դիմացի մարդիկ խաղում են առանց կանոնների»:
«Առավոտի» հարցին՝ այսինքն՝ խոստովանելով սխալները՝ կարծում եք, թե իշխանությունները դրանից կօգտվե՞ն, Գուրգեն Եղիազարյանը պատասխանեց. «Իհարկե»:
Ճիշտ է, մարդը սխալական է, և այսօր փաստ է, որ Լևոն Տեր-Պետրոսյանը ԲՀԿ-ի հետ իր հաշվարկներում սխալվեց, բայց Լևոն Տեր-Պետրոսյանի վարկանիշն այսօր ՀԱԿ-ի ներսում չընկա՞վ դրանից հետո՝ որպես լիդեր: Գուրգեն Եղիազարյանը պատասխանեց. «Նախ՝ ԲՀԿ-ի հետ հաշվարկներում Լևոն Տեր-Պետրոսյանը չի սխալվել: Իհարկե, չի սխալվել: Եվ նրա վարկանիշը, բնականաբար, չէր կարող ընկնել»:
Թերթի դիտարկմանը, որ ՀԱԿ-ն արդեն չկա, Գուրգեն Եղիազարյանը պատասխանեց. «Մեծագույն ունակություն է, երբ կարողանում ես քաղաքականութւան մեջ պաուզան ճիշտ ժամանակին պահել: Սա ճիշտ կետին ընտրած պաուզա է: Իսկ ընդդիմությունը լավ վիճակում կլինի վայրկյանների ընթացքում»: Գուրգեն Եղիազարյանը վստահեցրեց, որ ընտրություններից հետո դեռ տեսնելու ենք Կոնգրեսին ու նրա քայլը: Փակագծերը առայժմ չի բացում: Նա վստահեցրեց, որ ՀԱԿ-ին այդ 7 մանդատը չէր, որ պետք էր. «Չէ, չէ, մեր խնդիրը իշխանափոխությունն է»: Թե ո՞ւմ հետ պետք է իշխանափոխություն անեն, երբ ՀԱԿ-ի կորիզն արդեն չկա՝ Գուրգեն Եղիազարյանը պատասխանեց. «Իմ, քո հետ: Իրար կողքի ենք կանգնելու ու իշխանափոխություն անենք»:
