«Ազատամատիկների դաշինքն» իր ռազմավարական դրույթները հրապարակելիս արդեն մի անգամ հստակ հայտարարել է, որ «Ազատամարտիկների դաշինքը» պատրաստ է կամրջի դեր կատարել բոլոր այն ուժերի միջև, որոնք ժամ առաջ արմատական իշխանափոխություն են պահանջում՝ սկսած գործող նախագահից: Այս մասին մեզ հետ զրույցում նշեց Սմբատ Հակոբյանը՝ անդրադառնալով հարցին, թե ինչպես է գնահատում այն փաստը, որ կարծես թե ոչ իշխանական ուժերի ու Ռոբերտ Քոչարյանի դիրքորոշումները համընկնում են՝ հաշվի առնելով 2-րդ նախագահի վերջին հայտարարությունները՝ կապված երկրի տնտեսական վիճակի, սահմանադրական փոփոխությունների հետ:
Հարցին՝ մտահոգություն չունե՞ք, որ Ռոբերտ Քոչարյանի անձն ասոցացվում է ԲՀԿ-ի հետ, հաշվի առնելով, որ, ի վերջո, նաև ազատամարտիկների աջակցությունը կարող է որպես գործիք օգտագործվել նրանց կողմից, Սմբատ Հակոբյանը պատասխանեց. «Ես ո́չ ԲՀԿ-ի, ո́չ երկրորդ նախագահի անունից հայտարարություններ անելու իրավունք չունեմ, նաև ասեկոսեներով առաջնորդվող մարդ չեմ: Ես հիմա կարող եմ խոսել միայն «Ազատամարտիկների դաշինքի» իմ մարտական ընկերների անունից: Մենք ունենք մեր հստակ քաղաքական գիծը, և անկախ որևէ ուժի ենթակայությունից, ազատամարտիկները որևէ ուժի գործիքը չեն դառնալու, ինչքան էլ հզոր լինեն: Ես մի անգամ ասել եմ, որ 1988-ին ոչ մի գործիչ կամ ուժ մեզ ռազմաճակատի առաջին գիծ չի ուղարկել և չի դարձրել մեզ հայրենասեր: Մենք նույն արժեքների կրողն ենք ու մեր առջև հստակ խնդիր ունենք դրած, և ժողովուրդը թող համոզված լինի, որ մինչև վերջ գնալու ենք: Մեր գերագույն նպատակը հայ ժողովրդի և մեր պետականության անվտանգության ապահովումն է»:
Դիտարկմանը, թե ոչ իշխանական ուժերն իրենց պայքարի գլխավոր խնդիրներից մեկը համարում են սահմանադրական փոփոխությունները, մի՞թե ազատամարտիկները նույնպես դա են կարևորում, թե այլ օրակարգ են առաջարկում, Հակոբյանը պատասխանեց. «Իհարկե, ես և իմ ընկերները չենք կարծում, որ սահմանադրական փոփոխություններ կատարելով՝ հայ ժողովրդի վիճակը բարելավվելու է, անվտանգությունն ապահովվելու է: Ինչո՞ւ, եթե նախկինում ղեկավարներն ու թագավորները սահմանադրությունը թղթի վրա գրած չունեին, ժողովրդի մասին չէի՞ն մտածում: Մյուս կողմից, գոյություն ունեցող սահմանադրությունն էլ չի գործում, եթե գործի, բավական լավ վիճակ կլինի: Իսկ հիմա մենք չօգտագործվող բանի վրա ինչ-որ բան ենք ավելացնում: Աղբի վրա աղբ ենք ավելացնում: Նախ պիտի աղբը մաքրել, հետո ապագայի մասին մտածել: Մեր առաջնային խնդիրը հայ ժողովրդի և պետականության անվտանգության ապահովումն է, իսկ իշխանափոխությունը դրան հասնելու միջոցն է:
Ես գիտեմ, որ վախեցող, ընկրկող հրամանատարի հետևից ոչ ոք առաջին գիծ չի գնում: Մենք արդեն փաստացի սկսված պատերազմի առջև կանգնած ժողովուրդ ենք, և եթե վաղը մոբիլիզացիայի խնդիր լինի, ես համոզված եմ, որ ժողովուրդն այս գերագույն գլխավոր հրամանատարի հետևից չի գնալու: Այսինքն՝ պետք է նախ այդ հարցը կարգավորել, հետո անցնել մյուս հարցերին»:
Հարցին, թե ի՞նչ կանեն ազատամարտիկները, եթե փետրվարի 5-ին Գագիկ Ծառուկյանի հրավիրած խորհրդաժողովում արմատական գործողությունների ծրագիր չներկայացվի, Սմբատ Հակոբյանն արձագանքեց. «Մենք այդ մասին հստակ հայտարարել ենք, որ եթե մեզ հրավիրեն այդ համաժողովին, մենք կմասնակցենք, որովհետև Հայաստանի քաղաքական դաշտում կատարվող ցանկացած երևույթ մեզ էլ է մտահոգում: Մենք ուզում ենք տեսնել այն ուժերին, որոնք հանրահավաքներ կազմակերպել ու կազմակերպելու են, տեսնենք, թե ում հետ գործ ունենք»:
Ավելին՝ տեսանյութում:
