Բարաք Օբամայի կողմից Չաք Հեյգելին ԱՄՆ պաշտպանական գերատեսչության ղեկավար նշանակելու առաջարկությունը մտահոգում է Իսրայելին։ Հաղորդում է Agence France-Presse-ը՝ հղում անելով Իսրայելի խորհրդարանի խոսնակ Ռեուվեն Ռիվլինին։
Ռիվլինի խոսքերով՝ Հեյգելի կողմից առաջարկվող «փայլուն մեկուսացման» տեսությունը կարող է ազդել ԱՄՆ-ի միջազգային ռազմավարության վրա, որն անհանգստանալու առիթ է Իսրայելի համար, սակայն չի վախեցնում, հաղորդում է РИА «Новости»-ն։
«Փայլուն մեկուսացում» գիտաբառը (տերմինը) բնորոշում է քաղաքականություն, որը երկարաժամկետ դաշինքների կնքում չի նախատեսում:
«ВЗГЛЯД» պարբերականը գրում է, որ Իրանի ԱԳՆ ներկայացուցիչը հայտարարել է, որ Հեյգելի նշանակումը դրականորեն կազդի Թեհրանի և Վաշինգտոնի հարաբերությունների վրա։
ԱՄՆ-ի նախագահ Բարաք Օբաման վերջերս 66-ամյա հանրապետական Չաք Հեյգելին առաջադրել է Պենտագոնի ղեկավար պաշտոնը զբաղեցնելու համար։ Նա Վիետնամական պատերազմի վետերան է։
Հեյգելը մինչ այս աշխատել է Ջորջթաունի համալսարանում և եղել է ԱՄՆ նախագահի հետախուզության հարցերով խորհրդականների խմբի համանախագահ։
