Սուդանի նախագահ Օմար ալ-Բաշիրը և Հարավային Սուդանի նախագահ Սալվա Քիրը շաբաթ օրը համաձայնության են եկել հապշտապ և առանց նախապայմանների անցնել 2012թ.-ի սեպտեմբերին ձեռք բերված պայմանավորվածությունների կատարմանը: Համաձայն այդ պայմանավորվածության` պետք է ստեղծվեր բուֆերային, հակառազմականացված գոտի և արտահանվեր հարավսուդանական նավթը: Այս մասին հայտարարել է Աֆրիկյան միության գլխավոր միջնորդ Տաբո Մբեկին:
Երկու երկրների նախագահները հանդիպել են ԱՄ-ի շտաբ-բնակարանում` Ադիս-Աբեբայում: Նրանք ժպիտով սեղմել են միմյանց ձեռքը, սակայն զերծ են մնացել հայտարարություններից: Ինչպես պարզաբանել է Մբեկին՝ այժմ նախապատրաստվում են գոյություն ունեցող համաձայնագրերի իրագործմանը: Նա հավելել է, որ աշխատանքների այս փուլը նախատեսված է ավարտել հունվարի 13-ին:
Ինչ վերաբերում է վիճելի տարածք Աբեյին, ապա Հարավային Սուդանի ներկայացուցիչը հայտարարել է, որ համագումարի ավարտից հետո պետք չէ ակնկալել զգալի առաջընթաց, ամենայն հավանականությամբ` կպահանջվի միջազգային դատարանի միջամտությունը:
ԱՄ-ն առաջարկում է հանրաքվե անցկացնել վիճելի տարածքի պատկանելիության հարցի շուրջ: Այժմ այդ տարածքը վերահսկում է եթովպիական խաղաղապահների խումբը:
