Անկարան և Աբու-Դաբին համաձայնագիր են կնքել Թուրքիայի հարավում ածխի հանքավայրերի մշակման վերաբերյալ, որտեղ վառելիք են արդյունահանելու տեղի էլեկտրակայանների համար: Այս մասին հաղորդել է AFP-ն: Համաձայնագիրը կնքվել է ԱՄԷ-ի TAQA և թուրքական EUAS պետական ընկերությունների միջև:
Գործարքի արժեքը կազմում է 12 մլրդ դոլար: Ատոմային էլեկտրակայանի կառուցման վերաբերյալ Ռուսաստանի հետ համաձայնության ձեռքբերումից հետո սա ամենախոշոր ներդրումն է թուրքական տնտեսությունում:
Ըստ համաձայնագրի՝ արդիականացման նախագծի և 1,4 հազար մեգավատտ հզորությամբ կայանի ընդլայնումից բացի, կկառուցվեն ևս մի քանի ածխային հանքահորեր Աֆշին-Էլիբիսթան տարածաշրջանում: Սպասվում է, որ էլեկտրակայանի հզորությունը դրանից հետո կհասնի 8,2 հազար մեգավատտի:
Թուրքիան վերջին ժամանակներս ակտիվություն է ցուցաբերում էլեկտրակայանների կառուցման բնագավառում, որոնք կոչված են էներգիայի առանձին տեսակների օգտագործումը նվազեցնելուն և արտերկրյա ներմուծումներից կախվածությունը կրճատելուն: Երկրի տարածքում առաջին ատոմակայանը Թուրքիան կկառուցի Ռուսաստանի հետ համատեղ: Նախագծի ընդհանուր արժեքը կազմելու է 20 մլրդ դոլար:
Հիմա Անկարան բանակցություններ է վարում Չինաստանի, Ճապոնիայի, Հարավային Կորեայի և Կանադայի հետ երկրորդ ռեակտորի կառուցման շուրջ: Չի բացառվում, որ դրանց կհետևի ևս երկու կայանների կառուցումը:
