Մալաթիա-Սեբաստիա վարչական շրջանի ընդհանուր իրավասության դատարանում Ռոբերտ Պապոյանի նախագահությամբ ավարտվեց Նվեր Ո.-ի գործի դատական քննությունը:
25-ամյա սևանցի Նվերը մեղադրվում էր ՀՀ քրեական օրենսգրքի 139 հոդվածի 2-րդ մասի 3-րդ կետով այն բանի համար, որ 2014 թվականի ապրիլի 23-ին, ժամը 23-ն անց 30-ին Երևանի Օգանովի փողոցի շենքերից մեկի մոտ անչափահաս աղջկա նկատմամբ , նրա կամքին հակառակ, կատարել է սեքսուալ բնույթի գործողություններ:
Ըստ գործի նյութերի՝ 17-ամյա աղջիկն այդ օրը՝ ապրիլի 23-ին, մասնակցել է ջահերով երթին՝ դեպի Ծիծեռնակաբերդ: Եվ ուշ ժամին է վերադարձել տուն:
Աղջիկը, հասնելով իրենց թաղամաս, ցանկացել է զանգել մայրիկին:
Բայց հեռախոսը լիցքաթափվել էր:
Նա մոտեցել է իր տեսադաշտում հայտնված բարձրահասակ երիտասարդին, խնդրել է նրա հեռախոսը:
Երիտասարդը՝ Նվերը, տվել է հեռախոսը:
Աղջիկը զանգել է, մորն ասել, որ իրենց շենքին է մոտենում:
Հեռախոսը վերադարձրել է տղային ու քայլել է դեպի տուն:
Հանկարծ զգացել է, որ երիտասարդը գալիս է իր հետևից: Ճամփան անցնում էր ավտոտնակների արանքներով: Նվերը այդտեղ հասել է աղջկան ու տապալել է գետնին, պառկել է նրա վրա, ձեռքերը գցել աղջկա կրծքին ու ոտքերին: Մի ձեռքով էլ ջանացել է փակել նրա բերանը, բայց աղջիկը հասցրել է աղմկել:
Մայրը իջել էր աղջկան դիմավորելու, լսել է նրա ձայնը, մոտ է վազել: Նվերը, նրան տեսնելով, փախել է՝ չմտածելով միգուցե, որ իր հեռախոսահամարը արդեն ամրագրված է տուժողի մոր հեռախոսում:
Այդպես՝ սևանցի երիտասարդը հայտնաբերվել է, կալանքի տակ է առնվել: Երևանում ամրակազմ երիտասարդը բեռնակրություն էր անում, ապրելու մշտական վայր էլ չուներ…
Նվերը հիվանդ մայր ու խճճված կյանքով երկու քույր ունի, փաստորեն՝ անբարենպաստ ընտանիքի զավակ է:
Որպես իր պաշտպանության տակտիկա՝ Նվերն ասել է, թե տուժողի նկատմամբ բռնի սեքսուալ գործողություններ կատարելու նպատակ չի ունեցել, ցանկացել է… ծանոթանալ նրա հետ: Իսկ բերանը բռնել է այն ժամանակ, երբ աղջիկը սկսել է գոռալ…
Նվերն իրեն մեղավոր է ճանաչել ու զղջացել է կատարածի համար:
Մեղադրողը հաստատված է գնահատել Նվերի մեղքը, միջնորդել է, որ դատարանը Նվեր Ո.-ին մեղավոր ճանաչի մեղսագրված հոդվածով ու դատապարտի 6 տարի ազատազրկման:
Ամբաստանյալի շահերի պաշտպանը, ներկայացնելով Նվերի ընտանիքի ծանր սոցիալական վիճակը, այն, որ Նվերը ընդունել է մեղքը, զղջացել է, խնդրել է նրա նկատմամբ նշանակել օրենքով տվյալ արարքի համար նախատեսված նվազագույն պատիժը՝ 4 տարի ազատազրկում:
Նվերին մեղսագրված արարքի համար նախատեսված է 4-ից մինչև 10 տարի ազատազրկում:
Տուժող աղջկա օրինական ներկայացուցիչը՝ մայրը, լսելով ամբաստանյալի ընտանեկան ու սոցիալական ծանր վիճակի մասին, խիստ պատիժ չի պահանջել, ամբաստանյալի պատժի հարցը թողել է դատարանի հայեցողությանը՝ մեծահոգաբար ասելով նաև, թե նույնիսկ չէր ցանկանա, որ նա հայտնվի ճաղերի հետևում:
Ընդհանուր իրավասության դատարանը անչափահաս աղջկա նկատմամբ բռնի սեքսուալ բնույթի գործողություններ կատարելու համար մեղավոր է ճանաչել Նվերին ու դատապարտել 5 տարի ազատազրկման:
Նվերը ըմբռնումով է ընդունել նշանակված պատիժը, նա իրոք գիտակցել է իր մեղքը ու սահմանված պատժից չի դժգոհել:
