Թունիսի խորհրդարանական ընտրություններում առաջին անգամ հաղթում է «Նիդաա Թունիս» աշխարհիկ կուսակցությունը: «Ալ-Արաբիա» հեռուստաալիքի հաղորդմամբ՝ նա 80 տեղ կունենա 217 տեղանոց խորհրդարանում:
Կիրակի օրն ընտրություններում ներկայացված է եղել 1.300 ընտրական ցուցակ, որոնք ներառել են ինչպես քաղաքական կուսակցությունների ներկայացուցիչների, այնպես էլ անհատ թեկնածուների: 2011թ. ժամանակավոր խորհրդարանի ընտրություններում հաղթած «Ան-Նահդա» իսլամիստական կուսակցությունը կարող է հավակնել միայն 69 պատգամավորական մանդատի:
Ընտրություններն անցել են հանգիստ մթնոլորտում: Ընտրատեղամասերում անվտանգությունն ապահովել են մոտ 80 հազար ոստիկան, ազգային գվարդիայի ծառայող և զինծառայող: Ընտրությունների վերջնական արդյունքները Թունիսի ԿԸՀ-ն կհայտարարի ամենաուշը հոկտեմբերի 30-ին:
