«Ես ասել եմ, որ փետրվարի 18-ին միանշանակ գնալու եմ ընտրատեղամաս և Ընտրական օրենսգրքի համաձայն` քվեարկելու եմ փակ-գաղտնի: Եվ քանի դեռ նախագահի ընտրություններին բոլոր առաջադրվողները ներկայացված չեն, կոռեկտ չեմ համարում նման հարցերի պատասխանել»,- պատասխանեց Հանրապետություն» կուսակցության նախագահ Արամ Սարգսյանը լրագրողների այն համառ հարցերին, թե նախագահական ընտրություններին որ թեկնածուին է սատարելու:
Ա. Սարգսյանն անդրադարձավ նաև ՀՀՇ-ի համագումարում ՀԱԿ առաջնորդ Լևոն Տեր-Պետրոսյանի ելույթին, որտեղ նա խոսել էր Հայաստանի քաղաքական դաշտում արևմտամետ ու ռուսամետ կողմնորոշումների առկայությանը: «Տխուր է, որ քաղաքական դաշտում բաժանումներ են արվում: Իմ կարծիքով` ՀՀ քաղաքական դաշտում չկա ընդգծված արևմտամետ և չկա ընդգծված ռուսամետ, ուղղակի դա բաժանման հեշտ տարբերակ է: Իմ կարծիքով` բոլորն էլ հայամետ են: Պարզապես զարգացման ուղիների տարբերություն է` այնպես, ինչպես ես ու Վաղարշակ Հարությունյանը: Եվ դա բացարձակ չի խանգարում, որ մենք ընկերներ լինենք»,- ասաց Ա. Սարգսյանը:
Վերջինս ներկա էր ՀՀ նախկին վարչապետ Հրանտ Բագրատյանի ղեկավարած «Ազատություն» կուսակցության համագումարին, որտեղ ելույթ ունեցավ: «Հարգում եմ Հ. Բագրատյանին, նրան ճանաչում եմ դեռ վարչապետության շրջանից, երբ ես տնօրեն էի, իսկ ինքը երկիր էր ղեկավարում, որից հետո արդեն՝ ՀԱԿ-ի շրջանակներում: Նա իրապես ազատական գաղափարներ կրող անհատականություն է, որը երկրի ազատականացման գործում լուրջ լումա է ունեցել: Շատ դժվարին ժամանակներ են մեր երկրի համար, և շատ ողջունելի է, որ «Ազատություն» կուսակցությունը այսօր կարող է հայտ ներկայացնել` հանձին իր նախագահի, որը քաղաքական դաշտում պատահական մարդ չէ և մասնակցել է այս երկրում գրեթե բոլոր քաղաքական գործընթացներին, զբաղեցրել է լուրջ պաշտոն, կուսակցության նախագահ է»,- իր ելույթում հայտարարեց Ա. Սարգսյանը:
Նախագահական ընտրություններին Հ. Բագրատյանին պաշտպանելու հարցի առնչությամբ Ա. Սարգսյանն ասաց` քանի դեռ բոլոր թեկնածուները չեն առաջադրվել, կոռեկտ չէ այդ հարցին անդրադառնալ:
