Իսպանացի դիվանագետին, որի անունը չի հաղորդվում, երկուշաբթի օրը Սուդանի մայրաքաղաք Խարտումի իր տանը մահացած են գտել: Այդ երկրի ՆԳՆ ներկայացուցիչը հայտնել է, որ մահվան պատճառը եղել են դանակով հասցված բազմաթիվ վերքերը, հայտնում է ITAR-TASS-ը:
Ոստիկանության տվյալներով՝ 61-ամյա տղամարդը ղեկավարում էր Խարտումում Իսպանիայի դեսպանատան վիզաների բաժինը:
«Իսպանիայի դեսպանատան վիզաների բաժնի ղեկավարը գտնվել է իր տանը սուր առարկայով դանակահարված Գարդեն սիթի շրջանում Խարտումի արևելքում»,- ասվում է գերատեսչության կոմյունիկեում:
Ներկայումս հետաքննություն է տարվում: Հատուկ միջոցառումների մանրամասներն առայժմ չեն հրապարակվում՝ ելնելով հետաքննության շահերից:
Գերատեսչությունում չեն բացառում «եվրոպացիներից վրեժի» վարկածը, ինչպես դա եղել է հունվարի 28-ին, երբ Կենտրոնական Աֆրիկայի Հանրապետության քաղաքացի հանցագործը դանակի մի քանի հարված էր հասցրել Սուդանում ՌԴ դեսպանատան հյուպատոսական բաժնի ղեկավարին: Նա այդպիսով մտադիր է եղել վրեժ լուծել եղբոր մահվան համար, որն իր հայրենիքում սպանվել է ֆրանսիացի զինծառայողների ձեռքով:
