Արարատի և Վայոց Ձորի մարզերի ընդհանուր իրավասության դատարանը Գագիկ Սարգսյանի նախագահությամբ օրեր առաջ՝ սեպտեմբերի 11-ին ամբողջությամբ կարճել է Վեդի քաղաքի բնակչուհի Աննա Ա.-ի սպանության՝ դատաքննության փուլում գտնվող գործի վարույթը:
Գործի վարույթը կարճվել է ամբաստանյալի մահվան պատճառով:
Աննա Ա.-ի սպանության համար մեղադրվում էր Արարատի մարզի Վանաշեն գյուղի 44-ամյա բնակիչ Հակոբ Նահապետյանը, ում խափանման միջոցը կալանավորումն էր:
2014 թվականի օգոստոսի 14-ին, ժամը 22-ն անց 30-ի սահմաններում «Նուբարաշեն» ՔԿՀ կալանավոր Հակոբ Նահապետյանը, ով կալանավայրում գտնվում էր նյարդահոգեբույժի հսկողության տակ, սրիչով իր երկու բազուկների ու որովայնի շրջանում կատարել է ինքնավնասումներ ու մահացել է:
Ինքնասպանությունից առաջ նա երկտող է գրել՝ խնդրելով իր արարքի համար ոչ ոքի չմեղադրել:
Հակոբ Նահապետյանն ինքը մեղադրվում էր դիտավորյալ սպանության համար:
Ըստ մեղադրանքի՝ 2013 թվականի փետրվարի 9-ին, ժամը 18-ի սահմաններում Հակոբ Նահապետյանն իր սիրուհու՝ Աննայի հետ իր «Ֆորդ Տրանզիտ» մեքենայով գնացել է Ուրցաձոր գյուղի «Խանումի ձոր» կոչվող վայրից ոչ հեռու գտնվող ցորենի արտ: Հակոբը ցանկացել է սիրուհու հետ զրուցել նախորդ օրը նրա կողմից իր տանը հրահրած միջադեպի առնչությամբ, ցանկացել է նաև հաշտության եզրեր գտնել:
Պարզաբանման ընթացքում՝ ժամը19-ն անց 30-ի սահմաններում, վիճաբանություն է ծագել, Աննան, ըստ Հակոբի, վիրավորական խոսքեր է ասել նրա ընտանիքի հասցեին, ինչից դրդված, վրեժխնդիր լինելու ցանկությամբ Հակոբը նախ ձեռքով հարվածել է Աննային՝ պատճառելով արյունազեղումներ և այլ վնասվածքներ, ապա սպանելու դիտավորությամբ ձեռքերով սեղմել է կնոջ պարանոցը, պատճառել մեխանիկական շնչահեղձություն և խեղդամահ է արել նրան:
Գործը արդեն քննվում էր ընդհանուր իրավասության դատարանում, սակայն Հակոբ Նահապետյանը, չսպասելով երկրային դատարանի դատավճռին, սիրուհու սպանությունից մեկուկես տարի անց ինքնասպանություն է գործել՝ ինքը վճռելով իր ճակատագիրն ու պատիժը…
