karabakh-open.info-ի փոխանցմամբ` այսօր Ստեփանակերտի քաղաքապետարանի դիմաց շուրջ 70 երիտասարդներ հավաքվել են իրենց բողոքի ձայնն արտահայտելու հոկտեմբերի 1-ից ներքաղաքային տրանսպորտի ուղեվարձի թանկացման վերաբերյալ։
Ինչպես ավելի վաղ տեղեկացրել էինք, քաղաքապետի որոշմամբ, հոկտեմբերի 1-ից ուղեվարձը 70 դրամից նախատեսվում է դարձնել 100 դրամ։ Հայտարարությունը փակցված է նաեւ ներքաղաքային ավտոբուսներում։
Ակցիայի մասնակիցները դեմ են թանկացմանը ու քաղաքապետից պահանջում են հրաժարվել իր որոշումից։ Այս մասին իրենց կարծիքներն են փոխանցել ակցիայի մասնակիցները քաղաքապետ Սուրեն Գրիգորյանին, ով իջել էր առաջարկելու հարցը քննարկել ոչ թե դրսում, այլ շենքի դահլիճում։
Մասնակիցներից շուրջ 20 հոգի բարձրացել են դահլիճ, սակայն քաղաքապետը տեսնելով լրագրողներին հրահանգել է դուրս գալ նրանց դահլիճից։ Լրագրողները չեն համաձայնվել հեռանալ, իրենց անհամաձայնությունն են արտահայտել նաեւ ակտիվիստները՝ անիմաստ համարելով առանց լուսաբանման քննարկումները։ Քաղաքապետը լսելով ակտիվիստների նման դիրքորոշումը՝ դուրս է հրավիրել նաեւ բոլոր մասնակիցներին։
Ակցիայի մասնակիցները տեղեկացրել են, որ ակցիաները շարունակական բնույթ կկրեն՝ մինչեւ հասնեն իրենց պահանջին։
