«Այսօր, բացի Գագիկ Ծառուկյանից, ոչ մեկը չի կարող այնպիսի մեկնաբանություն տալ, որ գուշակություն չլինի: Սա ինչքան սպասելի էր, այնքան էլ անսպասելի էր: Բրյուսելյան այցից հետո, դիրքերի ամրապնդումից հետո այս հետընթացը ինչի՞ մասին կարող է խոսել՝ Աստված գիտի: Տասնյակ մեկնաբանություններ կարելի է տալ, որոնցից ոչ մեկը իրականությանը մոտ չի լինի: Անհրաժեշտ է սպասել, և կարճ ժամանակվա ընթացքում բոլորս էլ կիմանանք՝ որտեղից է քամին փչում, ուր ենք գնում»,- «Առաջին լրատվական»-ի հետ զրույցում հայտարարեց Եվրոպայի հայկական միությունների ֆորումի (ԵՀՄՖ) նախագահ Աշոտ Գրիգորյանը՝ մեկնաբանելով նախագահական ընտրություններում Գագիկ Ծառուկյանի չառաջադրվելը:
Նրա կարծիքով՝ անկասկած, մտափոխությունը եղել է Սերժ Սարգսյանի հետ հանդիպումից և խոսակցությունից հետո: Գրիգորյանը նշեց, որ սա պետք է Ծառուկյանը մեկնաբանի: Ըստ նրա՝ կար հույս, որ թիմով աշխատեին, լիներ մի նախագահ, որն ինքնագլուխ չէր ղեկավարի երկիրը, քանի որ միայնակ ոչ ոք չի կարող կառավարել երկիրը, այլապես ունենում ենք այն, ինչ ունենք:
Հարցին՝ հիասթափեցրե՞լ է Ծառուկյանի որոշումը, Ա. Գրիգորյանը պատասխանեց, որ եթե Ծառուկյանը աջակցեր նախագահին, կվերածվեր երկրորդ Արթուր Բաղդասարյանի, բայց փաստորեն գտել են նոր ուղի։ Ամենայն հավանականությամբ, բանակցությունների արդյունքում է ստացվել, որ իր դեմքը պահելու համար ԲՀԿ առաջնորդը չի աջակցում նախագահին, բայց գնում է փոխզիջման ու չի դնում թեկնածությունը:
«Չեմ կարող ասել՝ դրսի՞ց է եկել հրամանը: Ամեն ինչ հնարավոր է, բայց այսօր ճշմարտությունը վերլուծությունների արդյունքում չես գտնի: Կարճ ժամանակ հետո ամեն ինչ պարզ կլինի՝ կերևա, թե ինչ խաղաքարտեր են դրվում սեղանին: ՕԵԿ-ն ամբողջովին ծախվեց, եթե այսօր ՕԵԿ-ին ՀՀԿ-ից կտրեք, քանի՞ ձայն կհավաքի: Գագիկ Ծառուկյանն ու ԲՀԿ-ն կարողացել են իմիջ ստեղծել՝ առանց ՀՀԿ-ի: Բոլորը հիմա անորոշության մեջ են` լավ, բա հետո՞, որն է մեր ազգի փրկության ուղին։ Հայաստանը դատարկվում է»,- նշեց Ա. Գրիգորյանը:
