«Միսս Սինալոա նահանգ-2012» կոչմանն արժանացած գեղեցկուհին, որը սպանվել էր նոյեմբերի վերջին Մեքսիկայի արևմուտքում զինծառայողների և ավազակների միջև փոխհրաձգության հետևանքով, ինքն է կրակ բացել զինվորականների ուղղությամբ АК-47 ավտոմատից, որն ավելի ուշ հայտնաբերվել է նրա դիակի մոտ, հայտնել է երկրի գլխավոր դատախազությունը, փոխանցում է RIA Novosti-ին:
Նախ հայտնում էին, որ աղջիկն ու նրա ընկերը մահացել են պատահական գնդակներից: Հետո տեղեկություն հայտնվեց, որ 22-ամյա գեղեցկուհին կարող էր ինքը լինել հանցավոր խմբավորման անդամ և կրակել զինվորականների վրա, նաև որ հնարավոր է` ավազակները պաշտպանվել են նրանով որպես «կենդանի վահան»:
Սպանվածի ձեռքից վերցրած նմուշների քիմիական հետազոտությունը ցույց է տվել, որ աղջիկն իսկապես կրակել է զինվորների ուղղությամբ և մահացել է պատասխան կրակոցներից, նշում է գլխավոր դատախազությունը: Հետաքննությունը կշարունակվի, այդ թվում` 4 կալանավորվածների վերաբերյալ: Իշխանությունները ենթադրում են, որ ավազակների խմբի ղեկավար Օրսո Իվան Գաստելումը մոտ հարաբերություններ է ունեցել սպանված աղջկա հետ:
