Սելֆիին փոխարինելու է եկել «դրոնին»՝ գրում է The Telegraph-ը:
«Դրոնին», որը հայտնի է նաև որպես «երկնային սելֆի», ինքնանկար է՝ արված ոչ թե սմարթֆոնով, այլ փոքր անօդաչուի՝ դրոնի տեսախցիկով: Ընդ որում՝ լավ արդյունքի համար արվում է ոչ թե լուսանկար, այլ փոքր տեսանյութ, որը հետո տեղադրվում է Vine-ում, Instagram-ում:
Բրիտանական պարբերականը նշում, է որ առաջին «դրոնիներից» մեկը ներկայացվել է անցած ամիս՝ «Կաննի առյուծներ» գովազդային փառատոնի ժամանակ: Twitter-ը դրոններ էր օգտագործել փառատոնի հյուրերի մասին փոքր տեսանյութեր նկարահանելու համար:
Հիմա այդ ժանրը գրավում է Նոր Զելանդիայի ձյունածածկ լանջերը: Նոր Զելանդիայի զբոսաշրջության հարցերով խորհուրդը ամեն կերպ հանգստացողներին ոգեշնչում է «դրոնի» անել ու դրանք #Nzdronie հեշթեգով տեղադրել սոցցանցերում:
Ֆրանսիայի Վալ Տորանս լեռնադահուկային հանգստավայրում ևս հնարավոր է դրոնով օպերատորի վարձել՝ 10 րոպեն արժե 50 եվրո:
