Ֆրանսիական իշխանությունները անհրաժեշտ ամեն ինչ կանեն, որպեսզի հայտնաբերեն Air Algerie ավիաընկերության ինքնաթիռը, որում 116 մարդ է եղել, այդ թվում նաև Ֆրանսիայի 51 քաղաքացիներ, հայտարարել է Ֆրանսիայի նախագահ Ֆրանսուա Օլանդը, գրում է RIA Novosti-ն:
«Բոլոր միջոցները կմոբիլիզացվեն ինքնաթիռը հայտնաբերելու և ընտանիքներին անհրաժեշտ տեղեկատվություն տրամադրելու նպատակով: Որոնումները կշարունակվեն այնքան, որքան հարկավոր է, այդ թվում նաև գիշերը: Մենք ամեն ինչ կանենք, որպեսզի գտնենք ինքնաթիռը»,- ասել է Օլանդը վարչապետի, ԱԳՆ, ՆԳՆ, ՊՆ ղեկավարների, ինչպես նաև տրանսպորտի հարցերով պետքարտուղարի հետ արտակարգ խորհրդակցությունից հետո:
Նա նշել է, որ առայժմ չի կարելի ասել, թե ինչ է տեղի ունեցել: «Հայտնի է միայն, որ ժամը 01.48-ին (լույս հինգշաբթի գիշերը) ինքնաթիռի անձնակազմի ղեկավարը խնդրել է եղանակային վատ պայմանների պատճառով փոխել թռիչքի ուղղությունը»,- հայտարարել է նախագահը:
Օլանդը հայտնել է նաև, որ որոշել է հետաձգել Ռեյունիոն, Մայոտա և Կորոմյան կղզիներ այցելությունները և Փարիզում մնալ այնքան ժամանակ, որքան հարկավոր է ուժերի կոորդինացման համար:
