ԱՄՆ պետքարտուղար Հիլարի Քլինթոնը մտադիր է 2012-ի դեկտեմբերի 3-7-ը մեկնել եվրոպական երկրներ: Մասնավորապես, նա ծրագրում է այցելել Չեխիա, Բելգիա, Իռլանդիա և Հյուսիսային Իռլանդիա, rbc.ru-ի փոխանցմամբ` հայտնում է ամերիկյան արտաքին քաղաքականության գերատեսչությունը:
Քլինթոնն առաջինը կանգ կառնի Պրահայում: Հայտարարված է, որ չեխ պաշտոնատար անձանց հետ բանակցությունների հիմնական թեմաները կլինեն երկրի էներգետիկ անվտանգության ամրապնդումը, մարդու իրավունքների պաշտպանության համակարգերի զարգացումն ու գլոբալ մասշտաբով ժողովրդավարական բարեփոխումներին աջակցելու հարցերը:
Բելգիա այցի ժամանակ Քլինթոնը կայցելի ՆԱՏՕ-ի շտաբ-բնակարան և կհանդիպի կառույցի անդամ երկրների իր գործընկերների հետ: Կողմերը կքննարկեն հակամարտության հարցը Բալկաններում: Կքննարկվի նաև Աֆղանստանում իրավիճակի կայունացման հարցը:
Բրյուսելում նաև ԵՄ-ԱՄՆ Էներգետիկ խորհրդի նիստ տեղի կունենա, որին Քլինթոնը ներկա կլինի որպես համանախագահ: Հիմնական կետը շրջակա միջավայրի էներգետիկ անվտանգության և պահպանման նպատակով համագործակցության ընդարձակումը կլինի:
2012-ի դեկտեմբերի 6-7-ը Հիլարի Քլինթոնը կլինի Դուբլինում, որտեղ կմասնակցի նախարարների մակարդակով ԵԱՀԿ հանդիպմանը: Սպասվում է, որ Քլինթոնը կներկայացնի միջազգային մասշտաբով մարդու իրավունքների ամրապնդման ոլորտում ԱՄՆ ձեռքբերումները: Հյուսիսային Իռլանդիայի պաշտոնյաների հետ Քլինթոնը մտադիր է քննարկել խաղաղ կարգավորման, ինչպես նաև Հյուսիսային Իռլանդիայի տնտեսական ոլորտի զարգացմանն ուղղված ԱՄՆ-ի և Իռլանդիայի եռակողմ համագործակցության աշխատանքը:
