Ինչպես արդեն տեղեկացրել ենք, հրապարակվել է երկրորդ միջին քաշային կարգում WBO վարկածով աշխարհի չեմպիոն Արթուր Աբրահամի (40-4) հաջորդ մրցակցիանունը: 34-ամյա հայ բռնցքամարտիկն իր հաջորդ մենամարտը կանցկացնի սեպտեմբերի 27-ին՝ Գերմանիայում: Նրա մրցակիցը կլինի Պոլ Սմիթ-կրտսերը (35-3): Արթուրը պատասխանեց «Առաջին լրատվական»-ի հարցերին:
-Ի՞նչ կասեք մրցակցի մասին: Ծանո՞թ եք նրա հնարավորություններին:
-Նրանք լավ չեմ ճանաչում, դեռ չեմ դիտել մենամարտերը: Բայց գիտեմ, որ մասնակցել է աշխարհի առաջնության ու շատ ուժեղ է: Թերագնահատել չի կարելի: Նա կարողանում է շատ ուժեղ հարվածներ հասցնել: Մեկ դիպուկ հարվածը կարող է վճռորոշ լինել:
-Ի՞նչ ծրագրով եք նախապատրասվում: Դեռ բավականին ժամանակ կա՝ մոտ 2 ամիս:
-Արդեն սկսել եմ մարզվել: 2 շաբաթից գնում ենք հավաքների: Այդ ժամանակ ավելի ինտեսիվ կմարզվեմ: Պետք է ամբողջովին պատրաստ լինեմ:
-Գերմանիայի Կիլ քաղաքը հաջողակ է Ձեզ համար: 3 մենամարտ եք անցկացրել, 2-ում հաղթել նոկաուտով: Ի՞նչ եք կարծում, կլինի՞ 4-րդ հաղթանակը:
-Հուսով եմ՝ այո: Ամեն դեպքում, չես կարող կանխատեսել: Կարևորը հաղթանակն է:
-Սմիթը WBO վարկանիշային աղյուսակում երկրորդն է: Կալե Զաուերլենդը նշել էր, որ դիտարժան մենամարտ է սպասվում: Ի՞նչ մարտավարությամբ եք հանդես գալու: Շեշտը դնելու եք տակտիկայի՞, թե՞ դիտարժանության վրա:
-Ավելի շատ ուշադրություն եմ դարձնելու տաիկտիկայի վրա: Ճիշտ տատիկայով պետք է հաղթել: Ամեն ինչի վրա պետք է դնես շեշտը, քանի որ բացթողումների դեպքում հնարավոր է պարտվես:
-Ծրագրու՞մ եք մինչև տարեվերջ ևս մեկ մենամարտ անցկացնել:
-Ես կուզեի, բայց դեռ չեմ կարող հստակ պատասխանել: Մի քանի ծրագրեր կան: Շատ կուզեի դեկտեմբերին ևս մեկ մենամարտ անցկացնել ու գալ Հայաստան՝ տոնելու Նոր տարին: Կարծում եմ՝ այս մենամարտից հետո պարզ կլինի:
