«Հայաստան» համահայկական հիմնադրամի այս տարվա դրամահավաքն իսկապես համազգային բնույթ էր կրում` թափանցելով ամեն տուն, ամեն գյուղ, ամեն համայնք: Եվ բանն այն չէ, որ հեռուստամարաթոնը բոլորն էին նայում, այլ այն, որ մարզերում կոմունալ վճարումներ կատարող բնակչին գազի, էլեկտրաէներգիայի, ջրի կտրոնների հետ փոստատան աշխատողը տալիս էր նաև «Հայփոստի» կտրոն, վրան նշված որոշակի գումար` վճարված «Հայաստան» հիմնադրամի հաշվեհամարին: Դա առանձնապես մեծ գումար չէ և մարդու սոցիալական կյանքում որևէ փոփոխություն չի կարող մտցնել` ամեն մեկից մի 200-300 դրամ են պահում, բայց ինչո՞ւ այսպես գաղտագողի, ստիպողաբար, անապահովների ու թոշակառուների հաշվին: «Հրապարակ»-ը փորձեց հասկանալ` սա պարտադի՞ր պայման է, թե՞ ըստ ցանկության: Արարատի մարզի փոստատներից մեկի աշխատակցուհին պատասխանեց, որ լավ կլիներ փոխանցումը կատարեին ըստ ցանկության, բայց շատերն են հրաժարվում, հատկապես ունևորները, իսկ իրենց վրա, այսինքն` ամեն գյուղի փոստի վրա, ըստ բնակիչների քանակի, որոշակի գումարի պլան է դրված: Ասել են` եթե չհավաքեք բնակիչներից, ձեր գրպանից եք տալու գումարը: Կոնկրետ այն գյուղերը, որտեղ եղավ թերթի թղթակիցը, 10-15 հազար դրամ էր պարտադրված հավաքել:
«Հայաստան» համահայկական հիմնադրամից երեկ մի կերպ կցկտուր պարզաբանում ստացան: Հեռախոսները ողջ օրը չպատասխանեցին, ուստի հարցի պատասխանը ստանալու համար թղթակիցն այցելեց Հիմնադրամ: Հասարակայնության հետ կապերի բաժնում ոչ մի շունչ չկար ժամը 14:40-ի սահմաններում: Ի վերջո, եկան երկու աշխատակցուհիներ, զարմացան հարցի վրա և պարզաբանում տալու փոխարեն ասացին, որ «Հայփոստը» նման նախաձեռնությամբ է հանդես եկել, հեռախոսազրույց ունեցան ոմն Արմենի հետ, նա էլ փոխանցեց, որ թղթակիցը դիմի «Հայփոստի» մարկետինգի բաժին` Նարինեին, և նրանից պարզաբանում ստանա:
«Ասեմ, որ Նարինեին գտնելն էլ դյուրին գործ չէր: Մի կերպ գտանք ու լսեցինք պատասխանը. «Նման պարտադրանք ղեկավարության կողմից չի եղել, եթե նման բացթողումներ կամ սխալներ են լինում աշխատողների կողմից, նման աշխատողները պատժվում են` ընդհուպ աշխատանքից հեռացում: Պարտադրանք երբեք, առավել ևս կամավոր հիմունքներով վճարման դեպքում, չի կարող լինել»: Անհավատալի է, որ փոստատան աշխատողը սեփական նախաձեռնությամբ բնակիչներից պարտադիր փոխանցում է կատարում հիմնադրամի հաշվին: Իսկ երբ լուրը տարածվում է, փաստորեն, պատժում են կատարողին` ամենաթույլին ու անմեղին, ով բոլորովին կապ չունի այս ամենի հետ: Այդ իսկ պատճառով է, որ չենք նշում, թե որ փոստատներում ենք շրջել, պարզապես ասենք, որ դրանք մի քանիսն էին` մարզի կտրվածքով»,- գրում է «Հրապարակ»-ը:
