Դուդուկի վարպետ, միջազգային 21 մրցույթների դափնեկիր, ժողովրդական արտիստ Ջիվան Գասպարյանը համերգ է տվել Վորոնեժում: Նրա հետ զրուցել է «Վորոնեժի ժամանակ» կայքի լրագրող Մարինա Նովիկովան:
Ստորև ներկայացնում ենք հատվածներ հարցազրույցից: Մասնավորապես, Ջիվան Գասպարյանը պատմել է, որ երգեր է գրել ավելի քան 4 տասնյակ արտասահմանյան ֆիլմերի համար՝ իտալական, գերմանական, ռուսական ու ամերիկյան:
««Ռուսական տուն», «Եվգենի Օնեգին», «Դոկտոր Ժիվագո», «Գլադիատոր» ֆիլմերում հնչում է իմ երաժշտությունը: Հիմա ռուսական ֆիլմերի համար առաջարկներ չկան, իսկ Ամերիկայում կա՝ ֆիլմը կոչվում է «Աշխարհի վերջը»: Արդեն 3 տարի է, ինչ նկարահանում են: Շատ փողեր են ծախսել: Ֆիլմում ներգրավված են ամենալավ ու թանկ դերասանները: Ֆիլմերում ինձ ասում են՝ նվագիր, ինչպես զգում ես»,- անկեղծացել է դուդուկահարը:
Չնայած պատկառելի՝ 84-ամյա տարիքին, նրա համերգային գրաֆիկը 1 տարի առաջ արդեն կազմված է:
Ջ. Գասպարյանը պատմել է, որ ինքը անգլիացի մենեջեր ունի, որն իրեն տարին մեկ տալիս է ծրագիրը, որտեղ նշված է, թե «որտեղ, երբ և որ սրահում է հանդես գալու»:
«Նրանք շատ լուրջ աշխատում են: Նոյեմբերի 22-ին ավարտվում է Ռուսաստանում իմ շրջագայությունը, և ես հաջորդ օրը մեկնում եմ Փարիզ, հետո՝ Գերմանիա: Այնտեղ համերգներ ունեմ: Իսկ խորհրդային տարիներին պլան կար` ես տարեկան մասնակցում էի 280 համերգի»,- ասել է դուդուկահարը:
Նա լրագրողին նաև ծիծաղելով պատմել է, թե ինչպես է Իոսիֆ Ստալինն իրեն անվանական ժամացույց նվիրել, իսկ ինքը դա փոխանակել է 4 բաժակ գարեջրի ու նույնքան էլ կարկանդակների հետ:
«Այդ ժամանակ ես փոքր էի՝ 19 տարեկան: 1947թ. մասնակցում էի ինքնագործ խմբի, մեզ հրավիրեցին Մոսկվա, նվագեցինք Կրեմլում: Ես սոլո նվագեցի: Եվ ինձ ասացին՝ Ստալինը քեզ իր մոտ է կանչում, ու ինձ տվեցին կարմիր տուփ՝ Իոսիֆ Վիսարիոնովիչի ստորագրությամբ: Իսկ մենք այդ ժամանակ սոված էինք` պատերազմից հետո էր: Ու տղաներն ինձ ասում են. «Ջիվան, քո ինչի՞ն է պետք ժամացույցը, արի փոխանակենք»: Ու մենք այն փոխանակեցինք մի քանի բաժակ գարեջրի ու կարկանդակի հետ:
Այդ ժամանակ ես չէի հասկանում՝ ինչ եմ անում, չէի հասկանում այդ իրի արժեքը: Իսկ երբ մեծացա, վախենում էի այդ մասին ընդհանրապես պատմել: Հայտնի չէ, թե ինչպես դա կընկալվեր»,- պատմել է դուդուկահարը:
