Հայկական շուկայում զանգվածային տարածում ունեն կեղծված ապրանքները: Տնտեսական մրցակցության պաշտպանության պետական հանձնաժողով են դիմել տնտեսվարողներ, հարուցվել են մի քանի վարույթներ: Մասնավորապես շուկայից առգրավվել են ՀՀ-ում արտադրվող «Ռակշա» լվացող միջոցներ, իրանական «Գոլնար» օճառներ, իրանական «Նասիմ» ատամի մածուկ և ռուսական «Էլբոր» փականներ: Այս մասին այսօր Աղվերանում սկսված «Պետական գնումներ և անբարեխիղճ մրցակցություն» թեմայով երկօրյա սեմինար-քննարկման ժամանակ տեղեկացրեց ՏՄՊՊՀ նախագահ Արտակ Շաբոյանը: Ըստ նրա՝ կեղծ ապրանքանիշերը շատ լուրջ խնդիր է, որը ենթակա է ոչ միայն քրեական պատասխանատվության, այլև մրցակցության առումով:
ՏՄՊՊՀ մասնագետ Հայկ Վարդանյանը հայտնեց, որ տնտեսվարողը բողոքել է, որ շուկայում հայտնվել են անհայտ ծագման ապրանքներ, որոնք ամբողջությամբ նույնն են: Այսինքն, կա խախտում՝ առանց իրավատիրոջ համաձայնության ապրանքային նշանի օգտագործում, նաև մրցակցության տեսանկյունից տուժում են օրինական տնտեսվարողը և սպառողը: Նրա խոսքով՝ բնօրինակը կեղծվածից շատ դժվար է տարբերակել, միայն հատուկ նշումների միջոցով են տարբերվում:
Ա. Շաբոյանը հայտնեց, որ հանձնաժողովը խանութներից պահանջել է փաստաթղթեր, բայց պարզվել է՝ բոլոր խանութներն այդ ապրանքները ձեռք են բերել շուկայից, որն օրենքով թույլատրված է, և փաստորեն առաջնային վաճառողին չեն կարող գտնել:
ԳԴՀ Համբուրգի երկրամասային դատարանի նախագահող դատավոր Մարկուս Շնայդերը նշեց, որ նման դեպքերում, երբ առաջնային արտադրողին հնարավոր չէ գտնել, հարկավոր է պատասխանատվության ենթարկել վաճառողներին. «Սա միանշանակ ապրանքահենություն է: Կեղծված ապրանքը բնօրինակի անունն է կրում: Հնարավոր է նաև մտավոր սեփականության իրավունքների խախտում է առկա, պետք է քննել: Արդարացված է շուկայից հանելու և հետագայում վաճառելու որոշումը, որը խախտելու դեպքում պետք է քրեական պատասխանատվության ենթարկել»:
Ռուսաստանից «Էլբոր» փականներ ներկրող ընկերության շահերի պաշտպան փաստաբան Արտակ Միքայելյանը հայտնեց, որ կեղծ ապրանք արտադրողները, իրենց տվյալներով, Չինաստանից են, իսկ դրանք տարածողներն այնքան են հմտացել իրենց գործում, որ առանձին մեքենաներով են շրջում և առաջարկում ապրանքը, դրա համար նրանց գտնելը շատ բարդ է: Մինչդեռ արդեն մոտ 80 խանութներում այդ ապրանքից հայտնաբերել են: Պատասխանատվության ենթարկելու բարդությունն, ըստ նրա, այն է, որ քրեական գործ հարուցվում է միայն այն դեպքում, երբ ապրանքի արժեքը գերազանցում է 200 հազար դրամը:
