Ամերիկյան PVH Corp-ը Warnaco Group Inc-ի գնման 2,8 մլրդ դոլարանոց գործարքի արդյունքում մի տանիքի տակ կմիավորի Calvin Klein-ի ներքնազգեստի, ջինսի ու սպորտային հագուստի արտադրությունը:
Ինչպես հաղորդում է Reuters-ը, գործարքը, որը վճարվել է կանխիկով ու բաժնետոմսերով, նախատեսում է, որ PVH-ի հոսկողության տակ կանցնեն այնպիսի բրենդներ, ինչպիսիք են Speed –ն ու Chaps-ը:
«Գործարքն արդարացիորեն է գնահատված և ունի ռազմավարական մեծ նշանակություն»,- ասել է Լորեն Թեյլոր Վուլֆը՝ Blue Harbour Group-ի գործադիր տնօրենը:
Նշենք, որ PVH-ը Calvin Klein-ը գնել է 2003 թ. և այս բրենդի ներքո արտադրում է ամենօրյա ու սպորտային հագուստ:
Warnaco-ն 1997-ից ունի լիցենզավորված համաձայնագիր՝ Calvin Klein-ի ջինսեր ու ներքնազգեստ արտադրելու համար, այն ղեկավարում է Calvin Klein-ի 1760 խանութներն ամբողջ աշխարհում:
Սպասվում է, որ գործարքը կավարտվի 2013 թ. սկզբին:
Կանխատեսումների համաձայն՝ միավորված ընկերությունը կունենա տարեկան 8 մլրդ եկամուտ:
Ավելի վաղ հաղորդվում էր, որ ամերիկա-հոլանդական Phillips-Van Heusen ընկերությունը, որի տնօրինության տակ է գտնվում դիզայներական հայտնի Calvin Klein ընկերությունը, հայտարարել է ամերիկյան Tommy Hilfiger-ի գնման մասին:
