Մեր տեղեկություններով` Վարդանյանների ընտանիքին պատկանող «Գրանդ քենդի», «Գրանդ տոբակո», «Մասիս տոբակ» և այլ ընկերությունների ու սեփական վաճառքի կետերի աշխատակիցները աշխատավարձ ստանում են ծրարներով: Ավելի շուտ` աշխատողների համար գրանցում են նվազագույն՝ 50.000 կամ որևէ` սիմվոլիկ չափով գումար, սակայն իրական աշխատավարձը տալիս են ծրարով: Այդպիսով նրանք խուսափում են վճարել աշխատավարձից գանձվող սոցվճարներն ու եկամտահարկը: Բացի այդ, նրանք նաև չեն հայտարարագրում իրենց աշխատողների իրական քանակը:
Վարդանյանների ընկերությունների լրատվական ծառայության պատասխանատու Վահրամ Բրուտյանը մեզ հետ զրույցում ասաց, որ «այդ տեղեկատվությունը չի համապատասխանում իրականությանը»:
«Առաջին լրատվական»-ը տնտեսվարողների կողմից աշխատողների իրական քանակը և նրանց աշխատավարձերի իրական չափերը թաքցնելու և այդպիսով հարկային պարտավորություններից խուսափելու խնդրի մասին փորձեց մեկնաբանություն ստանալ Պետեկամուտների կոմիտեի նախագահի առաջին տեղակալ Արմեն Ալավերդյանից: Ի դեպ, այդ երևությը համատարած բնույթ է կրում մասնավոր հատվածում ու հատկապես խոշոր տնտեսվարողներին` օլիգարխներին պատկանող բիզնես-գործունեության մեջ:
Ա. Ալավերդյանը հաստատեց, որ տնտեսվարողները հարկերից խուսափելու համար նման արատավոր մեխանիզմներ կիրառում են, և որ աշխատողների ու աշխատավարձերի քանակը թաքցնելը Հայաստանի տնտեսության ստվերի բաղկացուցիչ մասն է: Նրա խոսքով` այդ երևույթներն իրենց մոտ «հայելու նման երևում են», ու հարկային ծառայողներն իրենց ամենօրյա աշխատանքում հետևում են դրանց բացահայտմանը:
Արմեն Ալավերդյանը նշեց, որ տնտեսվարողների այդ ստվերային գործունեության բացահայտումը, սակայն, միայն վարչարարությամբ անհնար է իրականացնել: Դրա համար անհրաժեշտ են օրենսդրական և այլ գործիքներ` ընդհուպ մինչև նրանց պատասխանատվության ենթարկելը:
ՊԵԿ փոխնախագահի խոսքերով` թաքնված աշխատատեղերի կամ աշխատավարձերի երևույթները գոյություն ունեն հատկապես սեզոնային աշխատանքի ոլորտում:
Հիշեցնենք, որ Վարդանյանների ընտանիքը Տավուշի և այլ մարզերում իրենց արտադրության արտահանման համար անհրաժեշտ թութուն աճեցնելու և մշակելու համար հազարավոր սեզոնային աշխատողների են պահում: Եվ, մեր տեղեկություններով, նրանց վճարումը հիմնականում գտնվում է ստվերային դաշտում:
