Ազգագրագետ Հրանուշ Խառատյանը, անդրադառնալով հերթական նախագահական ընտրություններին և հասարակության շրջանում ակնկալիքներին, նկատեց, որ ներկայում մի կողմից` կա նորի սպասում, մյուս կողմից` կարծես նորի փնտրտուք չկա, քանի որ մենք անընդհատ՝ 10-12 տարի նույն օղակի մեջ ենք պտտվում:
Ըստ նրա՝ առանձնապես հստակ էլ չէ, թե հասարակությունը գլոբալ իմաստով արդյոք կողմնորոշվե՞լ է` լիբերա՞լ Հայաստան է ուզում, թե՞ ավելի ձախ հայացքներ ունի: Ռեալ ուսումնասիրություններ էլ չեն կատարվել, քանի որ սկզբունքորեն անգամ քաղաքական կուսակցությունները այդ առաջարկը չունեն:
Ինչպես նկատեց բանախոսը, թվում էր՝ Դաշնակցությունն է կողմնորոշվել, սակայն դա այդպես էլ հստակ ձևակերպում չստացավ:
Ինչ վերաբերում է հայաստանյան քաղաքական կուսակցություններին և նախընտրական շրջանում նրանց ծավալած պայքարին, ապա, ըստ բանախոսի, ակնհայտ է, որ Հայաստանում միշտ հաղթում է իշխող կուսակցությունը` իր նախագահով, ու նոր անուններ չեն առաջանում: Նրա խոսքով՝ քաղաքական նոր դեմքերի ի հայտ գալուն խանգարում է նախատրամադրվածությունը. Հայաստանի առաջին նախագահ Լևոն Տեր-Պետրոսյանն էլ արդեն հանդես չի գալիս որպես հնարավոր նախագահ:
«Ակնհայտ է, որ հիմնական ծրագիրը կազմվում է Սերժ Սարգսյանի հետ»,- ասաց Հ. Խառատյանը:
Քաղաքական ուսումնասիրությունների հիմնադրամի հիմնադիր Արծրուն Պեպանյանն էլ իր հերթին հավելեց, որ մեզանում առկա է «մտածողության խորը դեֆիցիտ»:
«Ցավոք, պետք է արձանագրել, որ քաղաքական ուժերը զլանում են մտածել: Ինձ համար մեր քաղաքական ուժերը վախճանվել են 1995թ. աշնանը, երբ Վազգեն Մանուկյանն անհաջողության մատնվեց, ու ես դեռ հարց եմ տալիս ինքս ինձ՝ ինչո՞ւ այդպես եղավ»,- ասաց նա՝ հավելելով, թե դրանից հետո եկել ենք մի իրականության, երբ «պետության կարերը քանդվել են»:
Արծրուն Պեպանյանի կարծիքով` վարկաբեկված են և ընդդիմությունը, և իշխանությունը:
Անդրադառնալով ՀՀ նախագահ Սերժ Սարգսյանի երեկվա հանդիպմանը գլխավոր դատախազությունում` Հ. Խառատյանը նկատեց, որ դա ցույց է տալիս, թե Սերժ Սարգսյանը տեղյակ է իրավիճակին, սակայն տարակուսանք հայտնեց, որ նման հանդիպումները «տարօրինակ»
կերպով համընկնում են նախագահական ընտրությունների նախաշեմին: Ըստ նրա՝ այդ հանդիպումն ըստ էության ոչ մի հետևանք էլ չի կարող ունենալ: «Խոսքից այն կողմ ոչինչ չի անցնում»:
Լուսանկարը՝ PanARMENIAN Photo-ի
