Տնտեսական պատժամիջոցները, որոնք ԱՄՆ-ը ցանկանում է ներմուծել, մոտ ապագայում Ռուսաստանի վրա լուրջ ազդեցություն չեն ունենա: Իտալական Corriere della Sera-ին տված հարցազրույցում նման կարծիք է հայտնել նախկին ձեռնարկատեր Միխայիլ Խոդորկովսկին:
Նրա գնահատականով՝ միջոցառումները, որոնցով սպառնում է ԱՄՆ-ը, Եվրոպային կհարվածեն ավելի ցավոտ, քան Ռուսաստանին: «Տնտեսական պատժամիջոցները, նույնիսկ բավականին կոշտերը, չեն կարող արդյունք ունենալ միջնաժամկետ և կարճաժամկետ հեռանկարներում: Ռուսաստանն ունի բոլոր ռեսուրսները՝ առնվազն 3-5 տարի ինքնաբավ մնալու»,- ասել է Խոդորկովսկին:
Նա հիշեցրել է ոսկու զգալի պահեստների մասին, որոնք գտնվում են Ռուսաստանի տրամադրության տակ: «Մոսկվան իր էներգակիրների համար հեշտությամբ կարող է գտնել նաև նոր սպառողներ և դիվերսիֆիկացնել իր նավթի ու գազի իրացման շուկան: Իսկ Եվրոպան կարո՞ղ է տանել Ռուսաստանի դեմ պատժամիջոցների հետևանքները 3-5 տարի»,- հռետորական հարց է ուղղել նախկին ձեռնարկատերը:
Նրա կարծիքով՝ ուկրաինական ճգնաժամից միակ ելքը երկխոսությունն է Մոսկվայի հետ, ընդ որում՝ Ուկրաինան պետք է հանդես գա միասնական ճակատով, որպես միասնական պետություն՝ ներկայացված հեղինակավոր իշխանությունների, քաղաքացիական հասարակության և բնակչության կողմից:
