Երևանի Խանջյան 20 շենքի մոտակայքում՝ Jose ռեստորանային համալիրի հարևանությամբ կառուցվող շենքում երեկ փլուզում տեղի ունեցավ, շինարարները մնացին փլատակների տակ: Ընդհանուր առմամբ, տուժեց 11 մարդ, որոնցից մեկի վիճակը բժիշկները գնահատում են ծանր:
Այս նորակառույցը, «Առաջին լրատվական»-ի տեղեկություններով, պատկանում է Jose ռեստորանային համալիրին: Իսկ Jose-ի համասեփականատերը, ինչպես հայտնի է, Նավասարդ արքեպիսկոպոս Կճոյանի սանիկ Մհեր Ավետիսյանն է, ով հայտարարել էր, որ ռեստորանի մի մասը վաճառել է ԱԺ ՀՀԿ-ական նախկին պատգամավոր Հարություն Փամբուկյանին: Մեր տեղեկություններով, Jose-ի հարևանությամբ կառուցվող նորակառույցը պատկանում է հենց Նավասարդ արքեպիսկոպոս Կճոյանին:
2009 թվականին Երևանի քաղաքապետ Գագիկ Բեգլարյանը կանաչ տարածքում շինարարություն իրականացնելու թույլտվություն է տվել «Մանկական զվարճալիքներ կենտրոն» և «Լենա Թովմասյան» ՍՊԸ-ներին: Վերջիններս էլ շինաշխատանքները վստահել են «Չիլինգարյան դիզայն և շինարարություն» ՍՊԸ-ին: Այս տարվա օգոստոսին քաղաքաշինության նախարարության քաղաքաշինական պետական տեսչությունը վարչական տույժի է ենթարկել «Մանկական զվարճալիքներ» ՍՊԸ-ի տնօրեն Հ. Հակոբյանին և ինքնակամ շինարարության փաստի վերաբերյալ տեղեկացրել Երևանի քաղաքապետարանին: Բանն այն է, որ շինաշխատանքների թույլտվության ժամկետը լրացել էր, բայց տարածքում շինարարությունը շարունակվել էր: Քաղաքապետարանի հողի վերահսկողության վարչությունն իրականացրած ստուգումների ժամանակ բացահայտել էր, որ իրոք շինթույլտվության ժամկետը լրացել է: Կազմվել էր արձանագրություն, սահմանվել տուգանք, իսկ շինարարությունը դադարեցվել էր: Դրանից հետո օրենքով սահմանված կարգով ընկերությունները պետք է դիմեին ժամկետի երկարացման թույլտվություն ստանալու համար, բայց չեն դիմել ու անարգել շարունակել են կառուցապատումը մինչև երեկ:
Փաստացի Երևանի կենտրոնում՝ կանաչ տարածքների հաշվին օրը ցերեկով ապօրինի շինարարություն է կատարվել, իսկ իրավասու մարմինները աչք են փակել դրա վրա: Քաղաքապետարանը բավարարվել է միայն շենքի սեփականատերերին 2 մլն դրամ տուգանելով՝ հետամուտ չլինելով, որպեսզի երկարացվի շինարարության թույլտվության ժամկետը: Ակնհայտ է, որ հասարակ մահկանացուն չէր համարձակվի նման գործունեություն ծավալել Երևանի կենտրոնում, և փաստ է, որ շինության սեփականատերը ազդեցիկ մեկն է:
Շինության հետ կապված մյուս խնդիրն այն է, որ այն հանրային տարածքում է կառուցվում: Ինչո՞ւ են իրավասու կառույցները այգու տարածքում շինություն կառուցելու թույլտվություն տվել: Այս հարցի պատասխանը չկա: Ճարտարապետ Սաշուր Քալաշյանը «Առաջին լրատվական»-ի հետ զրույցում նշեց, որ ի սկզբանե սխալ թույլտվություն է տրվել, կառույցը սխալ տեղում է կառուցվում: «Կանաչ գոտիներում ցանկացած կառույցի տեղադրումը հետամնացության դրսևորում է: Լավ կլինի, որ սա առիթ հանդիսանա և այդ կառույցն այդտեղից վերանա: Մի երկու հոգու որ պատժեն, քավության նոխազ գտնեն, նման խնդիրներ այլևս չեն լինի Երևանում»,- ասաց ճարտարապետը:
«Երևան նախագիծ» ինստիտուտի նախկին տնօրեն, ճարտարապետ Գուրգեն Մուշեղյանը շենքի փլուզման մի քանի պատճառ առանձնացրեց: «Առաջին լրատվական»-ի հետ զրույցում ճարտարապետը նշեց, որ եղել է դեպքի վայրում և նախնական պարզել, թե ինչը կարող էր լինել փլուզման պատճառ: «Պատճառը վերևի հարկի ծածկն անելու ժամանակ տախտակամածի՝ «աբալովկա» կոչեցյալի ոչ լիարժեք ամրությունն էր: Բետոն լցնելու ժամանակ էլ հավանաբար փլուզումը եղել էր: Տակի ծածկի սյուներն էլ էին վնասված, լավ կլիներ ընդհանրապես քանդել այդ սյուները: Պետք է փորձաքննություն կատարվի՝ պարզելու փլուզման պատճառները, բայց առաջին տպավորությունս այն էր, որ շինարարները շինարարական տեխնոլոգիաների պահպանման կանոններն են խախտել: Կարող է նաև հաշվարկների մեջ են սխալվել»,- ասաց ճարտարապետը: Ընդհանրապես, Գուրգեն Մուշեղյանի խոսքով, այս օբյեկտը չպետք է այդտեղ լիներ, քանի որ դա այգու մի հատվածն է և հանրային օգտագործման տարածք: Ճարտարապետը նշեց, որ օրենսդրական դաշտը բավարար է ոլորտում կարգուկանոն հաստատելու համար: Ըստ օրենքի՝ նախքան նախագծին հավանություն տալը, այն պետք է անցնի փորձաքննություն: Սահմանված է նաև տեխնիկական և հեղինակային հսկողություն, շինարարների կողմից պետք է պահպանվեն շինարարության տեխնոլոգիաները: Այլ հարց է, թե արդյոք պահպանվում են այս ընթացակարգերը:
Քաղաքաշինության նախարարության մամուլի պատասխանատու Լուսինե Մարգարյանը չպատասխանեց մեր այն հարցին, թե ո՞վ պետք է վերահսկի, որպեսզի շինարարական կազմակերպությունները հետևեն անվտանգության նորմերին, որպեսզի շինարարական աշխատանքների ժամանակ դժբախտ դեպքեր չգրանցվեն, իսկ տուժածներն էլ համարժեք փոխհատուցում ստանան: Նա նշեց, որ այս հարցերին առայժմ չեն կարող պատասխանել: Երևանի քաղաքապետարանից նույնպես ասացին, որ այս հարցերն իրենց իրավասության շրջանակներում չեն:
«Չիլինգարյան դիզայն և շինարարություն» ՍՊԸ աշխատակիցները երեկ չպատասխանեցին մեր հարցերին՝ նշելով, որ ընկերության տնօրեն Հայկ Շատվերյանը տեղում չէ:
Նշենք, որ ՀՀ ոստիկանությունը դեպքի կապակցությամբ երեկ քրեական գործ է հարուցել ՀՀ քր.օր.-ի 157-րդ հոդվածի հատկանիշներով (Աշխատանքի պաշտպանության կանոնները խախտելը):
Հ. Գ. Հիշո՞ւմ եք` «Ալա-բալա-նիցա» ֆիլմում, երբ հարուստ կառուցապատողը էլիտար շենք է կառուցում առանց երկաթե կոնստրուկցիաների և շինարարների տարակուսանքին հակադարձում է, թե` իմ ընկերները, որ առանց արմատուրայի են կառուցում, ի՞նչ է լինում: Այնուհետև իր շենքի ամրությունն ապացուցելու համար մի երկու անգամ թռչկոտում է, ինչի հետևանքով շենքը փլուզվում է, ինքն էլ գնում է այլ աշխարհ: Փաստորեն այդ կատակը այնքան էլ հեռու չէր հայկական իրականությունից:
