ՀՀԿ-ն շատ լավ գիտակցում է, որ կենսաթոշակներն ընդամենը 2500 դրամով ավելացնելը և 35 000 դրամի հասցնելը չի մեղմում սոցիալական վիճակը: Այս մասին այսօր լրագրողների հետ հանդիպմանը ասաց ՀՀԿ-ական պատգամավոր Սուքիաս Ավետիսյանը՝ նշելով, որ այդ բարձրացումը, բնական է, շատ բան չի տալիս մեր բնակչությանը:
«Բայց մենք ինքներս ինչ էլ ուզենանք անել, պետք է կարողանանք մեր բյուջեի հնարավորությունները քննարկել: Բնական է, մեր ցանկությունները շատ են, և կարծում եմ` ավելի շատ ցանկանում է իշխանությունը, քան որևիցե մեկը: Բայց իշխանությունը ցանկացած ցանկություն իրականացնելիս փորձում է իր հնարավորությունները գնահատել»,- ասաց նա:
Անդրադառնալով նախկին վարչապետ Հրանտ Բագրատյանի՝ նվազագույն աշխատավարձը 72.500 դրամ սահմանելու առաջարկին` Սուքիաս Ավետիսյանը նշեց. «Եթե ՀԱԿ-ը կարող էր անել, թող էն ժամանակ 5000 դրամով ուսուցիչ չպահեր, թող էն ժամանակ ինքը 15.000 դրամով ուսուցիչ պահեր: Այսինքն՝ իրենցն ընդամենը ցանկությունների դաշտից է, իսկ մերը՝ հնարավորությունների ու ցանկությունների` միասին»:
Սուքիաս Ավետիսյանի խոսքով` լավ կլիներ, եթե ՀԱԿ գործիչներն առաջարկի հետ միասին նաև ցույց տային այն ուղիները, բյուջետային այն հնարավորությունները, որոնց միջոցով պետք է բարձրացվեն կենսաթոշակն ու նվազագույն աշխատավարձը:
Լուսանկարը՝ PanARMENIAN Photo-ի
