Ֆրանսիայի նախկին նախագահ Վալերի Ժիսկար դ՚ Էստենը որոշել է վաճառել Կլերմոն-Ֆերան քաղաքից ոչ հեռու գտնվող Շանոնա գյուղի ընտանեկան դղյակը և աճուրդի է հանել կահույքը, տան մնացած իրերն ու արվեստի նմուշները, հայտնում է BBC News-ը:
Սեպտեմբերի 29-ին կայանալիք աճուրդին վաճառքի կհանվի շուրջ 400 իր, այդ թվում՝ Պիեր Ժուլյենի՝ 30 հազար եվրո գնահատված «Քնած Արիադնա» արձանը և 15 հազար եվրո արժեք ունեցող Lepaute բրոնզե ժամացույցը:
Ֆրանսիայի նախկին նախագահը նախատեսում է աճուրդից շուրջ 400 հազար եվրոյի շահույթ ստանալ: Իսկ ահա դղյակի գինը 1,6 մլն եվրո է:
Վալերի Ժիսկար դ՚ Էստենի ընտանիքն այս դղյակ տեղափոխվել է 1930-ական թվականներին: Իր նախագահության տարիներին նա տունն օգտագործել է որպես քաղաքից դուրս գտնվող նստավայր, ուր ընդունում էր քաղաքական տարբեր գործիչների, այդ թվում՝ Հենրի Քիսինջերին և Արևմտյան Գերմանիայի կանցլեր Հելմուտ Շմիդտին:
Հիշեցնենք, որի Վալերի Ժիսկար դ՚ Էստենը Ֆրանսիայի նախագահի պաշտոնը զբաղեցրել է 1974-1981 թվականներին:
