«Անցյալ տարի ՄԱԿ-ի Անվտանգության խորհրդի կողմից Ադրբեջանին ընտրելը նշանավոր իրադարձություն դարձավ ոչ միայն երիտասարդ պետության պատմության մեջ: Դա նաև մեզ հնարավորություն է տալիս ամբողջ աշխարհին ցույց տալու մեր դիրքորոշումը, խաղաղության ու կայունության հաստատմանն ուղղված միջազգային ջանքերին աջակցելու մեր հնարավորությունները»: Ինչպես հայտնում է АПА-ն` այս մասին «Կամուրջների կառուցում» միջազգային կոնֆերանսին մասնակցելու նպատակով Բաքու ժամանած հյուրերի հետ հանդիպման ժամանակ ասել է Ադրբեջանի նախագահ Իլհամ Ալիևը:
Ըստ լրատվամիջոցի, Ալիևը նշել է, որ Ադրբեջանի ամենամեծ խնդիրը 20 տարի շարունակվող օկուպացիան է. «Մեր տարածքների զգալի մասը` Լեռնային Ղարաբաղն ու դրա հարևան շրջանները, որոնցում երբեք հայեր չեն բնակվել, և որոնք չեն մտնում Լեռնային Ղարաբաղի վարչական տարածքի մեջ, օկուպացված են: 20 տարի շարունակ աշխատում է միջազգային միջնորդ կազմակերպությունը, սակայն արդյունք չկա: 18 տարի է, ինչ տարածաշրջանում տիրում է կրակի դադարեցման ռեժիմը, որը ծառայում է ընդամենը փխրուն խաղաղության պահպանմանը:
Սակայն հարցի ամենակարևոր կողմն այն է, որ մենք չենք կարողանում հասնել ՄԱԿ-ի Անվտանգության խորհրդի բանաձևերի իրականացմանը, որոնք պահանջում են մեր հողերից անմիջապես ու անպայման դուրս բերել օկուպացիոն հայկական կազմավորումները: Սա իսկապես շատ վտանգավոր իրավիճակ է: «Ո՛չ խաղաղություն, ո՛չ պատերազմ կարգավիճակը» չի կարող հավերժ շարունակվել: Սակայն հայերը ցանկանում են ամրապնդել այդ ստատուս-քվոն, չեն ուզում ոչինչ փոխել և ազատել բռնազավթած տարածքները: Նրանք չեն ուզում լսել համանախագահ երկրների` Ֆրանսիայի, Ռուսաստանի և ԱՄՆ-ի ղեկավարների` իրենց ուղղված հորդորները: Այդ ղեկավարները բացեիբաց հայտարարել են նրանց, որ ստատուս-քվոն անընդունելի է: Ստատուս-քվոն փոխելու համար նրանք պետք է լքեն այդ տարածքները: Սա իսկապես ամենալուրջ խնդիրն է մեզ համար, որովհետև հակամարտությունը սառեցված չէ, իսկ խաղաղությունը բավական փխրուն է»:
