Ամերիկահայ գործարար Էդմոնդ Խուդյանին, ով Հայաստանում շինարարության ոլորտում բիզնես սկսելով՝ խաբվել էր, հարուցված քրեական գործով դեռևս տուժած չեն ճանաչել: Այս մասին այսօր լրագրողների հետ հանդիպմանը տեղեկացրին Խուդյանի շահերը ներկայացնող փաստաբաններ Նիկոլայ Բաղդասարյանն ու Լեռնիկ Հովհաննիսյանը:
Էդմոնդ Խուդյանը որոշել էր Հայաստանում շինարարական բիզնես ծավալել և այդ նպատակով ներդրել էր մեծ գումարներ: Նույն բիզնեսով նա զբաղվում է նաև ԱՄՆ-ում՝ իր ծանոթներից նախօրոք գումարներ է հավաքագրում, կառուցում շենքեր, հետո նախապես վճարած անձանց այդ շենքերում տալիս իրենց հասանելիք տարածքները, մնացածը վաճառում ու շահույթ է ստանում: Նույն մեխանիզմով նա շենք էր սկսել կառուցել Երևանում՝ Մաշտոցի 33/1 հասցեում:
Էդմոնդ Խուդյանն այսօր լրագրողների հետ հանդիպմանը նշեց, որ իր հաշվարկներով` շենքից զուտ 6 մլն դոլարի շահույթ էին ստանալու, սակայն կառուցապատողը խոշոր գումարներ է յուրացրել: Կառուցապատող Վլադ Մանգասարյանը Էդմոնդ Խուդյանի ստորագրությունները կեղծելով՝ մի քանի միլիոն դոլար է յուրացրել` կանխամտածված սնանկացնելով ընկերությունը:
Փաստաբան Լեռնիկ Հովհաննիսյանի խոսքով՝ 1,5 տարի է՝ քրեական գործ է հարուցվել կանխամտածված սնանկության փաստի առթիվ, սակայն չկա կասկածյալ: Սա այն դեպքում, երբ, ըստ փաստաբանի, առնվազն չորս մարդու, այդ թվում՝ Վլադ Մանգասարյանի նկատմամբ պետք է քրգործ հարուցվի: Սակայն իրավապահ մարմինները գործը կոծկելու ուղղությամբ են տանում, իսկ պատճառը, ըստ փաստաբանների և Էդմոնդ Խուդյանի, այն է, որ ամենաբարձր ատյաններից են հովանավորվում խաբեբաները:
«Այս գործով 1,5 միլիոն դոլարի վնաս է հասցվել միայն պետությանը, թաքցվել են հարկերը, բայց ՊԵԿ-ը չի հետաքրքրվում, չի ուզում այդ փողը: Այնինչ դեպքեր կան, երբ 5-6 մլն դրամ հարկեր չվճարելու համար գործարարների նկատմամբ քրգործեր են հարուցում: Վլադ Մանգասարյանի թիկունքին մարդ կա կանգնած, քանի որ միայնակ չէր համարձակվի նման քայլ անել»,- կարծում է Լեռնիկ Հովհաննիսյանը:
Փաստաբանները շարունակում են պայքարը: Նրանք նշում են, որ Հայաստանում սփյուռքահայ գործարարներին թալանող խումբ կա, որը հովանավորվում է բարձրաստիճան պաշտոնյաների կողմից, այդ թվում՝ իրավապահ համակարգի: Նրանք նշում են, որ ամենամեծ պատասխանատվությունը դատախազության վրա է, որը, սակայն, անհասկանալի պատճառներով անգործություն է ցուցաբերում տնտեսական հանցագործությունների նկատմամբ:
