Սիրայի հարցով ՄԱԿ-ի և ԱՊԼ-ի հատուկ հանձնակատար Լահդար Բրահիմին մտադիր է այցելել Ռուսաստան և Չինաստան` երկու երկրների ղեկավարների հետ քննարկելու Սիրիայում տիրող իրավիճակը: Այս մասին բանագնացը հայտարարել է ՄԱԿ-ի կենտրոնակայանում:
«Ինձ հրավիրել են այցելել Ռուսաստան և Չինաստան, ես մեծ հաճույքով կուղևորվեմ այնտեղ»,- ասել է Բրահիմին` ընդգծելով, որայդ ուղևորությունների հետ կապված որոշակի ակնկալիքներ ունի: Այս մասին հայտնում է ITAR-TASS-ը:
Մոսկվան ու Պեկինը երեք անգամ արգելափակել են ՄԱԿ-ի Անվտանգության խորհրդում Սիրիայի հարցով բանաձևի ընդունումը, որը Դամասկոսի հասցեին պատժամիջոցների սպառնալիք էր պարունակում:
Դամասկոսի վրա ճշում գործադրելու անհրաժեշտության մասին են պնդում արևմտյան երկրները` ԱՄՆ-ի և Ֆրանսիայի գլխավորությամբ: Նրանք վստահ են, որ եթե Ռուսաստանն ու Չինաստանն աջակցեն Ասադի հրաժարականի կոչերին, ապա դա դրական կազդի հակամարտության կարգավորման վրա:
Սիրիա և հարևան երկրներ 10-օրյա այց կատարած Բրահիմին հայտնել է, որ իրավիճակն արաբական երկրում շատ ծանր է, և հակամարտությունը դիվանագիտական ուղով կարգավորելու ջանքերը փակուղի են մտել: Նրա խոսքով` նախադրյալներ չկան այսօր կամ վաղը առաջընթացի հասնելու համար: «Բարեփոխումների անցկացումն այլևս բավարար չէ, փոփոխություններ են անհրաժեշտ»,- ասել է նա:
Բրահիմին հայտնել է, որ հաջորդ շաբաթ կրկին կուղևորվի տարածաշրջան, որից հետո կվերադառնա Նյու Յորք` Անվտանգության խորհրդում հերթական խորհրդակցությունների անցկացման համար:
