Ռամիլ Սաֆարովի էքստրադիցիան կանդրադառնա ԼՂ բանակցային գործընթացի վրա: Այս մասին այսօր «Առաջին լրատվական»-ի հետ զրույցում ասաց ԼՂՀ նախագահի մամլո խոսնակ Դավիթ Բաբայանը` անդրադառնալով ադրբեջանական ոճրագործ Ռամիլ Սաֆարովի էքստրադիցիային: Ըստ Դ. Բաբայանի` այն, որ համանախագահող երկրների դիրքորոշման և բանակցությունների ուղղության վրա տեղի ունեցածն ազդելու է, անկասկած է:
Նա նաև կարծում է, որ Մինսկի խմբի համանախագահող երկրների ղեկավարները պատկերացնում են, թե այսօր ինչ իրավիճակ է ստեղծվել և անպայման կարձագանքեն էքստրադիցիային: Դավիթ Բաբայանը բարձր գնահատեց նաև ԱՄՆ նախագահ Բարաք Օբամայի հայտարարությունը, որով անհանգստություն էր հայտնել Հունգարիայի քայլի վերաբերյալ:
«Սա Ադրբեջանի վարած ֆաշիստական, իսկ Հունգարիայի կողմից վարված ծախու քաղաքականության արդյունքն է: Քնած սպային սպանելուն հավասար ոճրագործություն էր ոճրագործին Ադրբեջան վերադարձնելը: Դա ցույց է տալիս Ադրբեջանում բարոյահոգեբանական վիճակի բարոյալքվածությունը: Տեղի ունեցած հանցագործությունը ոչ մեկի կողմից ընդունելի լինել չի կարող»,- ասաց Դավիթ Բաբայանը:
Հիշեցնենք, որ երեկ Հունգարիայի կառավարությունը Ադրբեջանին վերադարձրեց ութ տարի առաջ Հունգարիայում հայ սպա կացնահարած Ռամիլ Սաֆարովին, ով նախագահի հրամանագրով արդեն իսկ ազատության մեջ է:
