ՀՀ մարզերում 6 ճանապարհահատվածների հիմնանորոգման աշխատանքներն ավարտելու համար բյուջեից կհատկացվի 673 մլն 939.1 հազ. դրամ: Աշխատանքները մեկնարկել էին այս տարի, սակայն տրանսպորտի և կապի նախարարությունը որոշել էր, որ դրանց համար պետգնումների նպատակով հատկացված գումարներն ավելի «նպատակահարմար և անհետաձգելի է օգտագործել այլ նպատակներով», և բյուջեն վերաբաշխվել էր:
ՀՀ կառավարության վաղվա նիստի համար նախարար Գագիկ Բեգլարյանը մի որոշում է ներկայացրել, որով Նորաշեն-Սարչապետ հատվածի աշխատանքներն ավարտին հասցնելու համար հատկացվելու է 99 մլն 999 հազ. դրամ (ընդհանուր արժեքը՝ 697 մլն 43 հազ. ՀՀ դրամ), Տավուշի մարզի Թեղուտ գյուղի ճանապարհի համար՝ 57 մլն 45 հազ. դրամ (ընդհանուր արժեքը՝ 77 մլն 45 հազ. դրամ), Վայք քաղաքի Երիտասարդական փողոցի համար՝ 93 մլն 80 հազ. դրամ (ընդհանուր արժեքը՝ 124 մլն 830 հազ. դրամ), Հարթագյուղ համայնքը Վանաձոր-Գյումրի մայրուղուն միացնող ճանապարհահատվածի համար՝ 285 մլն 527 հազ. դրամ (ընդհանուր արժեքը՝ 379 մլն 977 հզ. դրամ), Բազմաղբյուր-Ղազարավան-Փարպի ավտոճանապարհի համար՝ 68 մլն 675 հազ. դրամ (ընդհանուր արժեքը՝ 93 մլն 895 հազ. դրամ), Լենուղի-Այգևան ավտոճանապարհի համար՝ 69 մլն 609 հազ. դրամ (ընդհանուր արժեքը՝ 226 մլն 127 հազ. դրամ):
