«Առաջին լրատվականի» զրուցակիցն է ՀՀԿ խմբակցության նախագահ, ՀՀԿ փոխնախագահ Գալուստ Սահակյանը:
– Ինչպես կմեկնաբանեք ԲՀԿ-ի դիրքորոշումը, ինչու եք որոշել՝ նման թուղթ ստորագրել կոալիցիոն ուժերով:
– Սա դիրքորոշումների ճնշում էր, որպեսզի կարողանանք այսպես ժողովրդի առաջ հանդես գանք, թե մեր ծիրն այսպես ուր է տանում՝ դրանով նպաստելով, որ մյուս քաղաքական ուժերն էլ կողմնորոշվեն, ժողովուրդն էլ քննարկի այդ ամենը, քանի որ սա կնպաստի լավ ընտրությունների անցկացմանը: Հիմնական վեճը գնում էր, թե այս պահին անենք, թե այլ պահի: Գագիկ Ծառուկյանը երբեք չի ասել, որ չի սատարում Սերժ Սարգսյանին: Ընդհակառակը մշտապես սատարել է Սերժ Սարգսյանին, նաև վերջին ընտրություններում ու դրանից հետո: Մամուլում և մեր քաղաքական հակառակորդներին ցանկալի տեսարան էր սպասվում որ իբր կոալիցիան կքանդվի, և դա հնարավորություն կտա ավելի մեծ արդյունավետությամբ հանդես գալ ընտրություններում: Դա մեզ հետ պետք չի կապել:
– Իսկ ինչու հենց Աժ ընտրություններից առաջ, ոչ թե հետո:
– Այդ հայտարարությունը գնահատում ենք որպես հայեցակարգ ու հաշվետվություն: Հարցադրում կա՝ կոալիցիային ըստ հուշագրի, մնացել է մեկ տարի, որ ավարտվի համագործակցությունը: և հիմա ժողովրդին ցույց ենք տալիս, թե դրանից հետո ինչ ենք մտածում մենք: Մենք մտածում ենք, որ մեր առջև դեռ ծրագրեր կան, կոալիցիան դեռ անելիքներ ունի, անավարտ, շարունակական ծրագրեր կան, և ինչպես պետք է հանդես գանք ԱԺ ընտրություններից հետո: Այդ ծրագիրը չի կարող մեկ տարվա լինել: Դեռ չի որոշվել՝ ԱԺ ընտրություններում ինչպես պետք է հանդես գանք, բայց պարզ է, որ դրանից հետո մենք միասնական ենք հանդես գալու: Այդտեղ անհրաժեշտություն առաջացավ նախագահի ընտրություններում միասնական թեկնածուով հանդես գալու, այսինքն՝ Սերժ Սարգսյանին սատարելու հարցը: Ու կարևոր չէ՝ մեկ ամիս ուշ, թե շուտ ենք հայտարարում, կարևորը՝ որպեսզի ժողովուրդը շփոթից դուրս գա և մտածի, թե ինչպիսի հեռանկար է ընտրում: Մենք մեր ցանկություններն ենք արտահայտել: Ժողովուրդը մեզ ձայն կտա՝ կշարունակենք աշխատել, ձայն չի տա, կամ քիչ կտա՝ այդ համամասնությամբ, այդ արդյունքներով ենք շարունակելու աշխատել:
– Արդյոք սա նշանակում է, որ չեք վստահում ձեր կոալիցիոն ընկերներին:
– Դրանք այն քաղաքական հնարքներն են, որ կարող են ձուլվել մեր հակառակորդների կողմից: Այստեղ վստահել, չվստահելու խնդիր չկա: Հիմա դեռ որոշված չէ՝ միասին ենք գնալու, թե առանձին: Դա չենք կարևորում: Կարևորում ենք համաձայնեցված գործողությունները, որովհետև՝ այսպես, թե այնպես, ինչ հայտարարությամբ էլ հանդես գանք, ԱԺ առաջիկա ընտրությունների պատասխանատվությունն ընկնում է կոալիցիայի վրա: Այլապես, նախկինում կոալիցիա էին կազմում, իսկ ընտրություններից առաջ ամեն մեկը առանձնանում էր, և ցեխ էր շպրտում ՀՀԿ-ի վրա: Հիմա, որպեսզի այդ խճանկարը չլինի, մենք ընդամենը հայտարարում ենք, որ մեկս մյուսիս նկատմամբ որևէ այլ գործոնով հանդես չենք գալիս, և մեր հաշվետվությունը միասնական է լինելու: Այս ֆորմատը դրական լուծումներ կապահովի ԱԺ ընտրություններում, և առավել ևս՝ հասարակությունը թող իմանա, որ գնալու ենք նախագահի ընտրությունների:
