1947թ. այս օրը Կահիրեում վախճանվեց քաղաքական, պետական գործիչ, Հայաստանի առաջին հանրապետության վարչապետ (1920թ.) Համո Օհանջանյանը:
Վաղ տարիքում անդամագրվել է ՀՅԴ-ին, հենց նրա կառավարությունն է ստորագրել Սևրի դաշնագիրը: 1918թ. մայիսին Փարիզի վեհաժողովին մասնակցելու համար հայկական պատվիրակության կազմում էր նաև Օհանջանյանը, ով Եվրոպայում մնաց մինչև 1920թ.: Վերադառնալով Հայաստան` զբաղեցրեց արտգործնախարարի պաշտոնը: Ա.Խատիսյանի հրաժարականից հետո 1920թ. մայիսի 5-ին դարձավ վարչապետ: Կառավարությունը հուլիսին հաստատեց Հայաստանի պետական զինանշանի նախագիծը, քաղաքացիության օրենքը:
Օգոստոսի 10-ին ստորագրվեց Սևրի պայմանագիրը: Հայ-թուրքական պատերազմի զինադադարի կնքումով Օհանջանյանի կառավարությունը կորցրեց իր հեղինակությունը ժողովրդի աչքին: Նոյեմբերի 23-ին Համո Օհանջանյանի կառավարությունը հրաժարական ներկայացրեց: Նոյեմբերի 25-ին դադարեցին նրա լիազորությունները:
Խորհրդային վարչակարգի հաստատումից հետո հայրենիքը փորձեց լքել նաև Հ. Օհանջանյանը, սակայն հայ-վրացական սահմանի վրա ձերբակալվեց: Նա և շատերը փրկվեցին 1921թ. փետրվարյան ապստամբության շնորհիվ: Ապրիլին Օհանջանյանը հեռացավ ու հաստատվեց Կահիրեում: Նա Համազգային հայ կրթական և մշակութային միության հիմնադիրներից է (1928թ.), առաջին նախագահը` մինչև մահը:
