Երեկ` հուլիսի 26-ին, Յուրմալայում անցկացվող «Նոր ալիք» 11-րդ միջազգային երաժշտական մրցույթում Հայաստանը ներկայացնող Սուրեն Առուստամյանը ազգային երգի ներկայացման շրջանակում հանդես եկավ Անդրեի «Իմ սերը քեզ» (խոսքերի հեղինակ` Ավետ Բարսեղյան) երգի կատարմամբ` նոր գործիքավորմամբ ու նոր մատուցմամբ:
Սուրենը մրցույթում 88 միավորով դարձյալ հայտնվեց 8-րդ հորիզոնականում (մրցութային առաջին փուլում 92 միավորով երգիչը գրավել էր 8-րդ հորիզոնականը)` հիմանականում արժանանալով ժյուրիի 9 ու 10 միավորներին:
Մրցութային 2-րդ փուլի արդյունքում պատվավոր առաջին հորիզոնականում Իտալիան ներկայացնող մասնակիցն է` Կոնստանցիո Դել Պինտոն:
Մրցույթի պաշտոնական փակումը նախանշված է հուլիսի 29-ին: Այդ օրը մեր երկիրը ներկայացնող երգիչը կկատարի Brandon Stone-ի Next to you երգը:
Մրցույթի ավարտին առաջին երեք հորիզոնականներն զբաղեցրած մասնակիցները կստանան դրամական պարգևներ:
Հիշեցնենք, որ հուլիսի 25-ին` մրցութային առաջին համերգին, երիտասարդ կատարողները ներկայացրել էին համաշխարհային հիթեր: Սուրեն Առուստամյանը հանդես էր եկել Էրիկ Քլեփթոնի Change the world հայտնի երգի կատարմամբ:
Հիշեցնենք, որ այս տարի մրցույթին մասնակցում է 14 երկրի 16 երգիչ-կատարող:
