Եվրոպական բանկերը վերջին 5 տարիների ընթացքում ԱՄՆ-ից դուրս են հանել 540 մլրդ դոլար՝ իրենց ակտիվների մեկ երրորդը: Այս մասին գրում է The Financial Times-ը՝ վկայակոչելով ԱՄՆ Դաշնային պահուստային համակարգի տվյալները:
ԱՄՆ-ում ԵՄ-ի բանկերի ակտիվության գագաթնակետը 2007թ. սեպտեմբերն էր. այդ ժամանակ նրանց ամերկյան ակտիվների ծավալը կազմում էր 1.51 տրլն դոլար: 2012թ. մարտին այդ ցուցիչն ընկավ մինչև 973 մլրդ դոլար, ինչը 2005թ. հետո ամենացածր ցուցանիշն է:
ԱՄՆ-ում խոշոր արտասահմանյան ներկայացուցչությունները պատկանում են ֆրանսիական BNP Paribas-ին և գերմանական Deutsche Bank-ին: Ընդհանուր առմամբ ԱՄՆ-ում գերմանական բանկերի ակտիվները կրճատվել են 2007թ. 427 մլրդ դոլարից մինչև 267 մլրդ դոլար: Ֆրանսիական ֆինանսական կազմակերպությունների ակտիվները 420 մլրդ դոլարից հասել են մինչև 373 մլրդ դոլարի:
Եվրոպական ոչ մեծ տնտեսությունների բանկերն ավելի շատ են կրճատել իրենց ամերիկյան բիզնեսը: Օրինակ՝ իռլանդական ֆինանսական կազմակերպությունների ակտիվները 130 մլրդ դոլարից նվազել են մինչև 3.6 մլրդ:
Որպես ԵՄ բանկերի բիզնեսի գնորդներ՝ հանդես են գալիս ամերիկյան և կանադական ընկերությունները, ինչպես նաև չինացի ներդրողների շահերը ներկայացնող կառույցները: Եվրոպական ակտիվների ամենաաշխույժ գնորդը Wells Fargo-ն է, որը վերջերս հայտարարել է, որ 6 մլրդ դոլարով ձեռք է բերել գերմանական WestLB-ի վարկային պորտֆելը 6 մլրդ դոլարով: Անցյալ տարի Wells Fargo-ն, JPMorgan Chase-ը և Lone Star Funds-ը 9 մլրդ դոլարով գնել էին իռլանդական Anglo Irish ազգայնացված բանկի վարկային պորտֆելը:
Եվրոպական բանկերի ակտիվների նվազման պատճառներից մեկը ռեգուլյատորների պահանջներն են: Ֆինանսական կազմակերպությունները ստիպված են վաճառել ակտիվները, քանի որ իշխանությունները նրանց պարտադրում են բարձրացնել սեփական կապիտալի մասնաչափը:
