Թուրքական Haber Vitrini կայքի փոխանցմամբ՝ ԱՄՆ-ում գործող Pew հետազոտական կենտրոնը մի շարք խնդիրների շուրջ հարցախույզ է անցկացրել մուսուլմանական վեց երկրում՝ Թուրքիա, Լիբանան, Եգիպտոս, Թունիս, Հորդանան ու Պակիստան: Հարցախույզի արդյունքները վկայել են, որ Թուրքիան ընկալվում է որպես Մերձավոր Արևելքի ժողովրդավարության մեջ ամենամեծ ներդրումն ունեցող երկիր:
Այդպես է կարծում Եգիպտոսի քաղաքացիների 78 տոկոսը, Թունիսի քաղաքացիների 74 տոկոսը, Հորդանանի քաղաքացիների 70 տոկոսը, Լիբանանի քաղաքացիների 49 տոկոսը: Պակիստանցիների 52 տոկոսն էլ կարծում է, որ Մերձավոր Արևելքի ժողովրդավարության մեջ ամենամեծ ներդրումն ունեցող երկիրը Սաուդյան Արաբիան է:
Ամենահանրահայտ մուսուլման առաջնորդ է ճանաչվել Թուրքիայի ներկայիս վարչապետ Ռեջեփ Էրդողանը, որի համբավը մուսուլմանների շրջանում զգալի աճ արձանագրեց Դավոսում Իսրայելի նախագահ Շիմոն Պերեսի հետ բախվելուց հետո: Էրդողանը ամենահանրահայտ առաջնորդ է ճանաչվել միանգամից 6 երկրում:
Էրդողանի ցուցանիշը կազմել է 65 տոկոս: Նա ամենաբարձր ցուցանիշը գրանցել է Հորդանանում՝ 76 տոկոս, ապա գալիս են Թունիսը (74 տոկոս) և Եգիպտոսը (71 տոկոս): Երկրորդ տեղում Սաուդյան Արաբիայի թագավոր Աբդուլլահն է՝ 58 տոկոս, իսկ երրորդ տեղում՝ Իրանի նախագահ Մահմուդ Ահմադինեժադը՝ 39 տոկոս: Սիրիայի նախագահ Բաշար Ասադը 11-րդն է:
