«Սեռադաստիարակությունը ընդհանուր առողջության մաս է. եթե երեխայի դաստիարակության մեջ պակասում է սեռական դաստիարակությունը, ապա այն թերի է»,- այսօր լրագրողների հետ հանդիպմանն ասաց հոգեթերապևտ, սեքսապաթոլոգ, ԵՊԲՀ սեքսոլոգիայի ամբիոնի դոցենտ Մարատ Զաքարյանը:
Ըստ նրա՝ երեխայի սեռական դաստիարակությունը սկսվում է դեռևս ներարգանդային շրջանում: Դրանից հետո երեխան աստիճանաբար ստանում է սեռական դաստիարակություն՝ մինչև 18 տարեկանը: Բժիշկն առանձնացրեց դեռահասության շրջանը, որի ժամանակ ավելի է կարևորում երեխայի դաստիարակությունը. «Այս շրջանում պատանիների մոտ տեղի են ունենում ֆիզիոլոգիական փոփոխություններ, շատ կարևոր է, որ մինչև 17-18 տարեկանը նրանք զերծ մնան սեռական հարաբերություններից, քանի որ գոյություն ունեն սեռավարակներ, առկա է նաև հոգեբանական գործոնը»:
Ասուլիսի մյուս բանախոս` «Սեքսուալ առողջապահություն» ՀԿ տնօրեն, ԵՊԲՀ սեքսապաթոլոգիայի և ռեպրոդուկտոլոգիայի կլինիկայի բժիշկ Ռուզաննա Ազատյանն էլ նշեց, որ սեռական դաստիարակության մեջ իրենց դերն ունեն ուսուցիչները: Նա առաջարկեց հատկապես կենսաբանության ուսուցիչների համար անցկացնել թրեյնինգներ, որպեսզի երեխաներին ճիշտ բացատրեն սեռական խնդիրների մասին և չխուսափեն մի շարք սեքսոլոգիական տերմիններից:
