Կարծես թե հասունացել է պահը, երբ քննչական մարմինները լուրջ ծառայողական քննություն պետք է անցկացնեն այն հրամկազմի շրջանում` կորպուսի հրամանատարից մինչև ամենացածր սպան, որի ենթակայության տակ է Հադրութի և, ընդհանրապես, Պաշտպանության բանակի հարավային հատվածը:
Պատճառն այն է, որ վերջին շրջանում հենց այդտեղ տեղակայված զորամասերում են արձանագրվում ծեծի կամ պարզապես հրազենային կրակոցների միջոցով զինծառայողներին սպանելու դեպքերը: Հադրութի զորամասերից մեկի զորանոցի նկուղում, հոկտեմբերի 3-ին գտել էին Սամվել Խաչատրյանի դիակը` կախված վիճակում: ԼՂՀ Հադրութի շրջանի Ջաբրայիլի զորամասերից մեկի առաջնային գծում նոյեմբերի 19-ին, ժամը 24-ի սայմաններում հրազենային կրակահերթերից զոհվել էին 4 ժամկետային զինծառայողներ` Լևոն Եսայանը` Տավուշի մարզի Բերդ քաղաքից, Ներսես Գալոյանը` Շիրակի մարզի Սարդարապատ գյուղից, Նարեկ Սահակյանը` Կոտայքի մարզի Հրազդան քաղաքից և ԼՂՀ-ից` Նվեր Սարգսյանը, ևս 4 զինծառայողներ ստացել էին հրազենային տարբեր աստիճանի վիրավորումներ: Ըստ պաշտոնական հաղորդագրության` կրակողը դեպքի ժամանակ վիրավորվածներից մեկն է` ժամկետային զինծառայող Մանվել Հազրոյանը: Եվ հիմա էլ Գևորգ Կոծինյանի դեպքը:
Ընդամենը օրեր առաջ` 2011թ. փետրվարի 6-ին ԼՂՀ Հադրութի շրջանի տարածքում տեղակայված զորամասերից մեկում ժամկետային զինծառայող Գևորգ Անդրանիկի Կոծինյանի (ԶԼՄ-ներով ազգանունը հաղորդվել է Կոտինյան) սպանության հանգամանքները նաև հարազատների միջոցով պարզելու նպատակով Հելսինկյան քաղաքացիական ասամբլեայի Վանաձորի գրասենյակի ղեկավար Արթուր Սաքունցը այցելել էր տուժողի հարազատներին: Իրավապաշտպանի փոխանցմամբ, Գ.Կոծինյանը ծառայել է պատերազմական գործողությունների մասնակից, զորամասի հրամանատար, գնդապետ Առուստամյանի պատասխանատվության տակ գտնվող զորամասում: Վանաձորի զինկոմիսարիատի կողմից զորակոչված Գևորգը հասցրել էր ծառայել ընդամենը ինն ամիս… Գ.Կոծինյանի դին հարազատներին հանձնվել է փետրվարի 8-ի երեկոյան: Սկզբում երիտասարդի մահվան մասին հայտնել են զինկոմիսարիատից և որպես պատճառ ներկայացրել` իբր նա ինսուլտ կամ ինֆարկտ է ստացել: Գ.Կոծինյանի մորեղբայրը, որը ներկա է եղել դիահերձմանը, իրավապաշտպանին հայտնել է, որ դիահերձման ժամանակ տղայի վրա հայտնաբերվել են տարբեր բնույթի վնասվածքներ, և ներկայացրել է մահվան փաստը հավաստող բժշկական վկայականը, որտեղ որպես մահվան պատճառ նշված է` սրտի ռեֆլեկտոր կանգ, արձանագրված են նաև հետևյալ վնասվածքները` կրծքավանդակի փափուկ հյուսվածքների, ձախ թոքի, սրտի արյունազեղումներ, աջ անրակի հոդախախտ, աջից գոտկային շրջանի փափուկ հյուսվածքների, աջ երիկամի և մակերիկամի արյունազեղումներ: Ըստ մորեղբոր` դիահերձման ժամանակ բժիշկը պատասխանել է վնասվածքների առաջացման պատճառների վերաբերյալ` իր բոլոր հարցերին, և եզրակացությունը միանշանակ այն է եղել, որ Գ.Կոծինյանը ենթարկվել է դաժան ծեծի: Նա միաժամանակ հայտնել է, որ որոշ տեղեկություններով, Գ.Կոծինյանին ծեծել են նույն զորամասում ծառայող ժամկետային զինծառայողները` Արտաշատ, Ջաջուռ (Լոռու մարզ), Երևան և Ստեփանակերտ համայնքներից: Վանաձորում գտնվող նույն զորամասի սպաներից մեկը, որն ուղեկցել է Գ.Կոծինյանի դիակի հանձնմանը հարազատներին, Սաքունցի հետ հանդիպման ժամանակ հայտնել է, որ բացի նշված չորս զինծառայողներից, ձերբակալվել է նաև օրվա հերթապահ սպան: Ըստ մորեղբոր ներկայացրածի, որը հաստատել է նաև սպան, չորս զինծառայողները գտնվել են ալկոհոլի ազդեցության տակ. որոշ տեղեկություններով, նրանք նշել են իրենցից մեկի կամ նրա մոր ծննդյան օրը: Գ.Կոծինյանի քեռին` Բորիս Ադամյանը, պատմել է, որ երկու ամիս առաջ եղել է զորամասում, և Գևորգը չի բողոքել ո՛չ ծառայությունից, ո՛չ էլ զինծառայողների վերաբերմունքից: Ավելին, լավ ծառայության համար արժանացել է պատվոգրերի: Սպանությունից մեկ օր առաջ նրա հետ խոսել է նաև մայրը, որին Գևորգը որևէ բողոք չի հայտնել: Գևորգի պապիկը նշել է, որ զանգել են զինկոմիսարիատից և ասել, որ Գևորգը ինսուլտ է ստացել, և որ դեպքը տեղի է ունեցել, երբ Գևորգը ցանկացել է բացել զորանոցի դուռը, իսկ քեռին պնդում է, որ Գ.Կոծինյանը մահացել է դաժան ծեծի արդյունքում, բայց որն է բուն պատճառը` առայժմ որևէ վարկած չկա: Միայն կարելի է պնդել, որ ըստ նախնական տվյալների` Գևորգի մոտ ալկոհոլ չի հայտնաբերվել: Քրեական գործ է հարուցվել ՀՀ քրեական օրենսգրքի 359 հոդվածի 2-րդ մասի 2-րդ կետով` «զինծառայողների փոխհարաբերությունների կանոնագրքային կանոնները խախտելը նրանց միջև ստորադասության հարաբերությունների բացակայության դեպքում, որն արտահայտվել է անձի պատիվն ու արժանապատվությունը ստորացնելով, նրան ծաղրուծանակի ենթարկելով կամ հալածելով կամ զուգորդվել է բռնություն գործադրելով…, որը կատարվել է` 2) մի խումբ անձանց կողմից», ինչպես նաև ՀՀ քրեական օրենսգրքի 112 հոդվածի 2-րդ մասի 6-րդ և 14-րդ կետերով` «Դիտավորությամբ առողջությանը ծանր վնաս պատճառելը…, որը կատարվել է` 6) մի խումբ անձանց կամ, կազմակերպված խմբի կողմից, 14) անզգուշությամբ առաջացնելով տուժողի մահ»:
Սա արդեն 2011թ. զինված ուժերում պաշտոնապես հայտարարված մահացության երկրորդ դեպքն է: Հիշեցնենք, որ առաջին զոհը եղել էր հունվարի 20-ին` շփման գծի հարավային հատվածում` Հորադիզում տեղաբաշխված հայկական դիրքերից մեկում. հակառակորդի ինտենսիվ հրաձգության արդյունքում զոհվել էր ՊԲ զինծառայող Հովիկ Մկրտիչի Սուքիասյանը: Այդ մասին հայտնում է ԼՂՀ ՊԲ լրատվության և քարոզչության բաժինը:
Հ.Գ. ՊՆ ղեկավարությունը պարտավոր է նշյալ հատվածում հսկողություն իրականացնող բանակային այդ կորպուսում լուրջ փոփոխություններ անել, թե չէ` տպավորություն է ստեղծվում, որ այնտեղ հրամկազմն ադրբեջանցիներով է համալրված…
«Ժամանակ» օրաթերթ
