ԲՀԿ խմբակցությունից անկուսակցական պատգամավոր Գրիգորի Մարգարյանը (Բելաջոյի Գրիշ) այսօր լրագրողների հետ ճեպազրույցում հայտնեց, որ կառավարության 2012-2017թթ. գործունեության ծրագրին դեմ է քվեարկել, քանի որ այդպես էր որոշել խմբակցությունը:
Ամեն դեպքում, նրա բնորոշմամբ ծրագիրը «փայլուն» է: «Առաջին լրատվական»-ի հարցին՝ իսկ ի՞նչ խոցելի տեղեր ունի ծրագիրը, Մարգարյանը պատասխանեց, որ խոցելի տեղեր ամեն տեղ կան: Սակայն մեր խնդրանքը՝ մի քանի խոցելի կետ ներկայացնել, վրդովվեցրեց Մարգարյանին. «Կետերով չեմ պատրաստվում նշել: Հո քննություն չեմ տալիս, որ կետերով նշեմ: Ծրագրերը սովորաբար լինում են քաղաքական: Բոլորը լավ, փայլուն ծրագրեր են, ոչ մեկ չի կարող ասել՝ այս ծրագիրը վատն է, բայց քաղաքական որոշումը ոնց է կայացվում, թե որ թիմը ոնց է քվեարկում, դա արդեն թմի որոշումն է»:
Ընդ որում՝ մեծամասնական ընտրակարգով ընտրված մականունավոր պատգամավորը, ում աջակցել էր անձամբ Սերժ Սարգսյանը, թեև կառավարության ծրագրի քվեարկության ժամանակ առաջնորդվել է «թմային որոշումով», սակայն հայտարարեց, թե իրեն լիովին ազատ է զգում և հնարավոր է, որ հետագայում կողմ քվեարկի ՀՀԿ-ական պատագամավորների ներկայացրած օրինագծերին:
