Ադրբեջանական Turan լրատվական գործակալության փոխանցմամբ՝ լրագրողների ազատության և անվտանգության ինստիտուտի ղեկավար Էմին Հուսեյնովն այսօր մամուլի կենտրոնում տեղի ունեցած ասուլիսի ժամանակ բացարձակապես անհիմն է որակել լրագրողների ազատության ու անվտանգության ինստիտուտի լրագրող Մեհման Հուսեյնովի ձերբակալումը, որին մեղադրում են խուլիգանություն գործելու մեջ.
«Մեհմանը որևէ ֆիզիկական ուժ չի գործադրել ոստիկանության արագ արձագանքման գնդի աշխատակցի նկատմամբ: Չնայած դրան՝ ոստիկանությունը ձերբակալեց նրան՝ վստահեցնելով, թե նա կարող է խույս տալ հետաքննությունից: Սակայն կանչվելու ժամանակ Մեհմանը գտնվում էր երկրի սահմաններից դուրս, և եթե ցանկանար, ապա հետ չէր վերադառնա: Սակայն նա նշանակված ժամանակին եկավ Բաքու և ներկայացավ ոստիկանություն»:
Մեհմանի փաստաբանն իր հերթին հայտարարել է, որ տվյալ դեպքում նրա նկատմամբ որպես խափանման միջոց կալանք ընտրելն ապօրինի է, քանի որ նա մեղադրվում է 221-րդ հոդվածով (խուլիգանություն), որը թույլ է տալիս ձերբակալումից խուսափում:
Բոլոր ելույթ ունեցողները միահամուռ հայտարարել են, որ Մեհման Հուսեյնովը հանդիսանում է «Եվրատեսիլի բանտարկյալ»: Ադրբեջանական իշխանությունները սկսել են հետապդնել բոլոր նրանց, ովքեր «Եվրատեսիլ 2012» երաժշտական մրցույթի օրերին խոսել են Ադրբեջանի խնդիրներից ու մարդու իրավունքների խախտումներից: Նշվում է, որ եթե Մեհմանը դատապարտվի, ապա միջազգային կազմակերպությունները նրան կճանաչեն որպես խղճի բանտարկյալ:
