Պանրի թանկացումից հետո ներկա պահին պանրի սպառումը 20 տոկոսով նվազել է: Կալինինոյի «Դուստր Մելանյա» ընկերության տնօրեն Ռուբիկ Հարությունյանի խոսքերով, առաջինն ինքն է կողմ, որ պանիրը էժան գնով սպառվի, որովհետեւ էժանի հետ հեշտ է աշխատել: Բայց արտադրությունն ինքը շուկայում առկա գների մեջ, ըստ տնօրենի, չի տեղավորվում: «Այստեղ շահույթի խնդիրը չէ, այստեղ զուտ կայացնելու խնդիր կա: Միայն Տաշիրում 25-30 արտադրության վերամշակման փոքր արտադրամաս կար, հիմա մնացել է ընդամենը դրա մեկ երրորդը: Տեսեք, դեկտեմբեր-հունվարից աստիճանաբար սկսում է ծինը` մինչեւ մարտ – ապրիլ ամիսը: Իսկ այդ 4 ամիսը կաթը համարյա շատ քիչ քանակի է լինում: Հիմա ամբողջ հարցը մրցակցությունն է. բոլոր աշխատողները ցանկանում են, որ իրենց հիմնարկը չփակվի, իրենց հիմնարկը չսնանկանա, եւ այդ մի քանի լիտր կաթը իրենք վերամշակեն: Բնականաբար, մրցակցության պարագայում կաթի գինն աճում է»,- պարզաբանեց պանրի արտադրությամբ զբաղվող ամենախոշոր ընկերություններից մեկի տնօրենը: Բացի այդ, ըստ նրա` ամբողջ հանրապետությունում երաշտ է եղել, եւ անասունների ոչ լիարժեք արոտը ազդել է նաեւ կովերի կաթնատվության վրա: Արդյունքում` կաթնատվությունը մինչեւ 30 տոկոս այս տարի նվազել է:
