Թուրքական Hürriyet թերթը, վկայակոչելով ամերիկյան Wall Street Journal-ին, հայտնում է, որ նախորդ տարվա դեկտեմբերի 28-ի երեկոյան Իրաքի սահմանի մոտ գրանցված Ուլուդերեի միջադեպը, որին զոհ էր գնացել 34 քուրդ խաղաղ բնակիչ, տեղի է ունեցել ամերիկյան կողմի մեղավորությամբ:
Հիշեցնենք, որ այդ օրը թուրքական օդուժը, հետախուզական տվյալներ ստանալով, որ Ուլուդերեում կենտրոնացել է քուրդ զինյալների (PKK) խումբը, իր F-16 կործանիչներով հարված է հասցնում այդ խմբին: Սակայն դրանից հետո պարզվում է, որ հարվածի հետևանքով զոհված 34 քրդերը ոչ թե PKK-ի զինյալներ են, այլ մաքսանենգ ճանապարհով Հյուսիսային Իրաքից Թուրքիա մազութ ու ծխախոտ փոխադրող խաղաղ քուրդ բնակիչներ:
Եվ ահա, Wall Street Journal-ը գրում է, որ Ուլուդերեում «քուրդ զինյալների կենտրոնանալու» մասին հետախուզական տվյալներն ԱՄՆ-ն է փոխանցել թուրքական կողմին, ինչն էլ հանդիսացել է օդային օպերացիայի սկսման պատճառ: Այս մասին հայտնել է Պենտագոնի բարձրաստիճան պաշտոնյաներից մեկը՝ ընդգծելով, որ ԱՄՆ-ն այդ տվյալները ստացել է անօդաչու թռչող սարքի միջոցով: Նա հավելել է, որ օպերացիայի սկսման մասին որոշումը եղել է թուրքերի որոշումը, ԱՄՆ-ը կապ չունի դրա հետ: